Wa mi mangilkil uy!

Kusganon nga nanghimakak kadtong tulo ka polis sa Punta Princesa police station nga gipasanginlang nangilkil sa ilang dinakpan.

Si PO3 Alejandro Batobalonos nga maoy team leader sa mga polis nga midakop ni Mercenario Rollon, mibarug g'yod nga dili tinuod nga nakadawat sila og P30,000 gikan sa puyo-puyo ni Rollon.

Matud ni Batobalonos nga siya ug ang duha niya ka kauban nga sila si PO1 Leopoldo Bullido ug PO1 Ansgar Bebeboy Reales, gipasanginlan lang kay wala man sila mosugot nga dili lang pasakaan og kaso si Rollon.

Giangkon ni Batobalonos nga ang puyo-puyo ni Rollon mitanyag g'yod nga mobayad sila og salapi - bahala na kuno og mabaligya ang ilang balay - basta dili lang mapasakaan og kaso ang dinakpan.

Buyno, akong klarohon nga dili ko makasulti og kinsa kanila ni Batobalonos ug sa puyo-puyo ni Rollon ang namakak.

Apan sayon ra kaayo ni nga mahibaw-an kon duna nay imbistigasyon kay kon dunay daghang mga silingan ni Rollon nga makamatuod nga ang suspetsado gidakop niana pang mga alas utso sa gabii sa Oktobre 31, 2006 - may katinuoran ang pangangkon sa puyo-puyo ni Rollon.

Kay basi sa police blotter didto sa Punta Princesa police station, si Rollon kuno nadakpan nila ni Batobalonos niana na mang mga ala 1:30 sa kaadlawon sa Nobiyembre 1.

Kon tinuod man nga nadakpan si Rollon niana pang sayong gabii, unya gitala sa blotter nga ala 1:30 na sa kaadlawon, makapangutana kita kon nganong gilangay-langay man ang pag-blotter?

Tambag nako sa puyo-puyo ni Rollon nga mas labing maayo g'yod nga ipadangat niya kining maong isyu sa Internal Affairs Service aron mahimoan og imbistigasyon.

Angay usab nga malipay niini ang mga polis kay kon tinuod nga wala sila mangilkil, malimpyohan ang ilang ngalan. Tiaw mo, ang inahan ni Rollon nga si Pacita, nagpa-interview didto sa Palace of Justice sa giingong binuang sa mga polis.

Ang rason ni Batobalonos mao nga imposible nga tinuod ang pasangil batok kanila kay sa wala pa motumaw ang isyu gipasakaan na nila og kaso ang ilang dinakpan didto sa hukmanan.

Buyno, may rason usab si Batobalonos. Ang tinuod, ang gireklamohan sa puyo-puyo ni Rollon kay bisan og nakabayad na kuno sila og kwarta nga halin sa ilang gamay'ng balay, wala buhii ang iyang "bana."

Giingnan ra man kuno siya nga inay duha ka kaso, paglapas sa section 5 ug section 11, sa dangerous drugs law, ang section 11 ra ang ipasaka.

Kon tinuod man gani kini, masabot nga gipahangyo ra ang dinakpan kay kon mapasakaan siya og section 5, wala g'yoy pyansa ug kon makonbikto, life imprisonment ang silot.

Na hala, huwaton nato nga ugma, moadto ang puyo-puyo ni Rollon sa Internal Affairs Service aron mopadangat sa iyang pormal nga reklamo batok sa tulo ka polis.

Kadtong uban nga dunay reklamo sa mga polis, ayaw kataha, itug-an sa Renbor Patrol. Aria ko sa opisina kay andam akong moabi-abi kaninyo.

* * *

Husto ba god kon moingon ka nga "Bangga sa Awit?" Kon ako ang pangutan-on, dili kini husto kay ang ininglis sa "bangga" mao ang collision sama sa binanggaay sa duha ka sakyanan.

Kon awit gani ang hisgutan, ang tukma nga pulong mao ang "Indigay sa Awit." Gusto lang nako nga makapahinumdom ko sa mga kauban kong magsusuwat sa tukma nga paggamit sa pinulongan.

Kon duna mo'y reklamo, mahimo nga ipadangat ninyo sa akong e-mail address "[email protected]" ug pwede sab sa suwat.