Sabta pag-ayo

Dili makabasol si SPO1 Marcial Ocampo ni Regional Trial Court judge Ireneo Lee Gako Jr. nga mikonbikto kaniya tungod kay mahulagway man nga dili kaayo lig-on ang iyang mga depensa.

Ako maoy gidistino sa The Freeman pagsunod sa tanang husay sa maong kaso mao nga bisan og balintuwad-tuwaron ang mga detalyi niini, masaysay nako ang mga mahinungdanong punto.

Kon ang usa ka akusado positibo gani nga itudlo sa mga eyewitnesses nga mao ang naghimo sa krimen, ang iyang lig-ong depensa mao ra g'yod ang pagprobar nga imposible kini nga mahitabo.

Himoon kini pinaagi sa pagpresentar og mga ebidensya nga atol sa oras nga nahitabo ang krimen, didto siya sa laing lugar.

Gihimo tuod kini ni Ocampo kay gikan kuno sa alas 2:30 ngadto sa alas tres sa hapon niadtong Abril 12, didto man siya sa Cebu Provincial Police Office sa Lahug.

Dunay mga opisyal sa kapolisan nga misuporta sa iyang pamahayag. Ang maong mga polis hinoon mitataw nga wala na sila makahibalo diin si Ocampo lapas sa alas tres.

Si Bantay Dagat project director Elpidio "Jojo" dela Victoria gipusil ug gipatay didto sa lagwerta sa iyang panimalay sa San Roque, Talisay mga pasado alas tres sa hapon adtong Abril 12.

Matud ni Ocampo nga pag-abot niya sa ilang panimalay gikan sa Cebu Provincial Police Office, nag-ilis siya sa gisul-ob niyang police uniform, dayon miadto sa usa ka barberohan aron magpatupi.

Apan nakapaturok kini og pagduda kay ang barbero nga si Adrade Comision nga giingong maoy nagtupi kaniya, miingon nga ang pagtupi nagsugod alas tres ug nahuman alas 3:20 sa hapon.

Dihang si Ocampo gipasulti sa hukmanan, mitug-an kini nga ang pagtupi kaniya nagsugod alas 3:20 ug nahuman alas 3:45. Ang gibasihan nila sa oras mao ra ang relo diha sa bungbong.

Gisukna pa gani sila sa huwes kon managlahi ba diay ang ilang pagbasa sa oras? Ingon si Ocampo "Yes your honor."

Dayon, ang igsoon ni Comision nga si Adonis, miingon man nga siya ang nagtupi ni Ocampo ug buntag man to sa Miyerkules, dili man hapon.

Ang mga abogado ni Ocampo mipadali-dali kaniya pagpabalik sa witness stand ug ibutyag nga nagpausab diay kuno si Ocampo pagpatupi kay wala makagusto sa pagtupi kaniya ni Adonis.

Mao kadto nga makapaduda, hinoon dili imposible nga dunay tawo nga magpausab pagpatupi kay gibatian sa una niyang tupi. Sa ato pa, makapaduda nga si Ocampo mahimong wala g'yod didto sa barberohan niadtong Miyerkules sa hapon.

Unya, lig-on lagi ang pamahayag sa upat ka mga eyewitnesses, ilabi na ang kang Evan Echavez nga miangkong gitionan siya'g armas ni Ocampo dihang gibabagan niya aron dili makadagan ang gisakyang tricycle sa dayon na untang ikyas.

Kay mga tunga lang sa metros ang ilang gilay-on, natataw gayod ni Evan ang dagway sa tawo nga mition niya'g armas.

Si Roberto Goc-ong, ang drayber sa taxi nga nasakyan sa mipatay ni Dela Victoria, mitudlo usab ni Ocampo nga mao ang misakay kaniya. Natiman-an g'yod ni Goc-ong ang bayhon og panagway ni Ocampo kay iya man kining gipakighinabian atol sa iyang pagsakay.

Dili mga paryente ni Dela Victoria sila si Echavez ug si Goc-ong. Buyno, sa Motion for Reconsideration ni Ocampo, kinahanglang itataw niya pag-ayo kon unsay iyang argumento.

Pait kaayo alang ni Ocampo ang nahitabo kaniya. Tiaw mo, siguradong mataktak siya sa pagka polis, wala na siya'y sweldo para sa iyang pamilya.