EDITORYAL — Hunyo 12 or Hulyo 4?

Naay mga Pinoy nga niselebrar sa Philippine Independence Day kagahapon (July 4) kay matud nila mao gyud kini ang husto nga adlaw sa kagawasan sa atong nasud.

Kanus-a ba gyud kita na-independent? Adtong Hunyo 12 or Hulyo 4?

Kadtong miinsister nga Hulyo 4 gyud ang atong kagawasan mirason nga human gideklarar ang atong pagka-independent sa Estados Unidos, nahimo dayon kita nga Republika ug giila kini sa tanang nasud sa kalibutan.

Suma pa nila, si Emilio Aguinaldo ra ang nag-ingon nga independente na ang Pilipinas dihang iyang giwarawara ang atong bandila sa iyang balkon sa Cavite.

Matud pa sa mga pro-Hulyo 4 human misinggit si Aguinaldo nga independente na ang Pilipinas, walay laing nasud sa kalibutan ang misangon niini.

Unsa man gyuy husto nga petsa sa atong adlaw sa kagawasan? Kini magpabilin nga kuwestiyon tali sa duha ka pundok -- ang nagtuong Hulyo 4 maoy husto ug ang grupo sa nagtuo nga ang Hunyo 12 maoy kinahanglan saulogon.