Unsa gyuy nasuk-an ni Pangilinan!

Sa atong pagsuwat niini, giingon nga imbistigahon kono kadtong estudyante sa Cavite nga nagbugal-bugal samtang nag-speech ang Presidente.

Di man ko activist, di sad ko militante, di pod komunista, alang nako, di gyud maayo ang gibuhat sa estudyante nga si Pangilinan.

Di ko mo-encourage niini sa akong mga anak nga maoy buhaton. Sa akong kabatan-on kanhi, wa'a gyud ni masulod sa akong ulo.

Hinoon, sa among panahon, daku kaayo ang among respeto ngadto sa mga tawo nga nag-alagad sa gobiyerno. Mga public servants gud ni sila, mga public officials. Bisan ang mga police sa among panahon, respetado kaayo sila. Magbalantay gud sa kalinaw.

Anyway, that was many, many years ago. Lahi na kaayo karon ang image sa gobiyerno kay sa among panahon. Lahi na kaayo ang panan-aw sa katawhan ngadto sa gobiyerno, itandi sa among panahon.

Ngano man ni?

Maoy hinungdan nga kon imbistigahon man si Pangilinan, maoy imbistigahon ang hinungdan ngano nga nakaingon siya niadto? Imbistigahon kon unsay nasuk-an ni Pangilinan kang Gloria? Imbistigahon kon tinuod ba nga nagpunay lang tag lie, cheat ug steal? Lagmit mao ni ang nasuk-an ni Pangilinan.

Imbistigahon sad kon ang sentimento ni Pangilinan, ni-reflect ba sa sentimento sa uban? Tingali bayag mao sad ni ang feeling karon sa kinabag-ang bahin sa katawhan. Himoon ang imbistigasyon in aid of good governance, aron kalikayan ang kasuko sa katawhan.

Kon buot hunahunaon, bisag di maayo ang gihimo ni Pangilinan, angayan siyang pasalamatan sa iyang gihimo tungod kay nakapabukas kadto sa mga mata sa taga-administrasyon nga tingali bayag something is wrong with them.

Kay bisan si Pangilinan mismo nasayod sa kangil-ad sa iyang gibuhat. Apan, iya tingaling nakita nga tingalig dunay gihimo ang ato karong taga-gobiyerno nga mas ngil-ad kay sa iyang gihimo. Akong usbon, Dro, supak kaayo ko sa iyang gihimo.

Komentaryo? Text 0916-6484650