EDITORYAL - Death penalty gi-abolish na?

Nakapaukay ang deklarasyon ni Presidente Gloria Arroyo nga iyang gi-commute kun gipaus-usan ngadto na lang sa life sentence ang hukom nga kamatayon nga gipakanaug ngadto sa mga nakahimog dinagkong salaud.

Natural lang nga kini gikalipay niadtong mga natanggong sa death row ug ilang mga kabanay. Ug natural lang usab nga mikisikisi ang mga kabanay niadtong mga biktima sa salaud nga nahimo sa mga gipasaylo sa Pangulo.

Wala klaroha sa Presidente kun iya na bang gi-repeal kung gipapha ang death sentence law. Ug dinhi ning dapita kinahanglan nga iyang klarohon ang iyang baruganan sa maong kontrobersiyal nga balaod.

Tungod kay wa man matino kun napapha na ang death penalty, magpadayon gihapon ang mga maghuhukom sa pagpakanaug sa hukom kamatayon ngadto sa mga kriminal nga nakahimog sala diin kamatayon ang sukli niini. Sa katapusang ihap, adunay 1,237 ka mga konbiktado nga anaa sa death row.

Maayo tingaling klarohon-- ibutang sa black and white -- ni Mrs. Arroyo ang iyang bag-o pang gibuhiang deklarasyon.