Buotang vendors

Nalipay ko kay mipatoo og gamay ang mga naninda og imahen sa mga santos diha sa luyong bahin sa Basilica del Santo Niño. Gisibog nila og gamay ang ilang mga baligya ngadto sa daplin.

Apan kuwang pa gihapon. Bisan gipilo tuod nila ang mga tapangko sa ilang tindahan aron dili magyongyong ngadto sa karsada, apan duna pa'y mga tinda nga gibutang nila lapas sa puthaw nga koral.

Ang mga naninda diha dapit sa eskena, misibog tuod og mga usa ka dangaw apan lapas pa gihapon sa gutter sa karsada. Kon unsa lagi'y gikasabotan, ato g'yod nga tumanon.

Unya bitaw og tinud-on na kamo sa City Hall, modayon man mo'g paluoy-luoy og mopasalig nga motuman na g'yod sa ilatid kaninyo sa syudad.

Mao na dihang dapita nga wala ko mobilib sa mga opisyal sa inyong kahugpungan. Wala sila maka-police sa kaugalingon nila nga grupo.

Tan-awa ra god ninyo ang mga naninda og prutas diha sa aseras sa dalan Pelaez, kilid sa University of San Carlos. Hapsay og limpyo kaayo ang ilang mga tindahan.

Kamo diha, suwayi kuno og panglimpyo ang inyong mga tindahan, dili ba pwerteng daghana nga mga butang nga maisip na nga sagbot apan padayon ninyong gipangtipigan.

Alang sa mga opisyal sa mga Sto. Niño vendors, pangutan-on ko kamo kun kang kinsa kanang mga tindahan diha nga walay abli-abli nga gihimo lang bodega sa mga baligya.

Nakadugang kana nga nakapahugaw tan-awon sa maong dapit. Ang inyong mga tindahan apil nga duawon usahay sa mga turista nga langyaw nga mamalit og souvenir.

Apan tan-awa ang dagway sa inyong mga tindahan. Ang sementado nga tindahan nga gihimo sa Young Builders Corporation ug gidonar ngadto sa dakbayan, dayon gipagamit kaninyo nga libre sulod sa tulo ka tuig gikan adtong 2002, limpyo unta kaayo.

Kamo sab nga taga City Hall, kuhaa ra god na ninyo ang puthaw nga koral nga inyong gibutang atubangan sa ilang tindahan.

Dayon kamong mga kawani sa demolition team sakmita g'yod ninyo ang mga baligya nga ibutang diha sa karsada gawas sa ilang mga tindahan.

Usa sa mga naninda og imahen, si Constantino "Tatay" Amora, mipasalig nga silang mga tindera mopasulod na sa ilang mga tinda ngadto sa tindahan kon makuha na ang koral nga puthaw.

Unya, kanang gibutang nila nga "extention" nga atop sa tindahan, angay kana nga kuhaon kay nakapalapad kana sa tindahan.

Husto si Tatay Tino. Kon wala na ang atop nga gidugang pagbutang sa tindahan, mapugos ang mga tindera pagpasulod sa ilang mga baligya.

Akong balikon, kining akong paninguha nga makorehean ang mga abuso sa mga Sto. Niño vendors gitumong dili pag-harass kanila kon dili, ang pagpanindot ra sa maong dapit.

Sama sa mga Sto. Niño vendors, ako pobre usab apan dili ko mosakripisyo og ubang tawo kon moabot ang higayon nga makabaton ko og negosyo.

Ang pipila ka tindera diha nakapahasol kay sa pagpalapad nila sa ilang tindahan kaniadto, nahasol ang mga tawo nga mangagi sa karsada ug labaw na ang mga motorista.

Happy Sunday kaninyo mga Sto. Niño vendors, maayo unta og magbinuotan na g'yod kamo aron mag-uban na kita sa pagpalambo sa atong dakbayan.

* * *

Mag-uban kita sa Birador, sa Freeman unya sa Martes. Ang Renbor Patrol mabasa na lang ninyo sa Miyerkules, Sabado ug Domingo.