EDITORYAL - 'Twin festival' sa Carcar

Naglaraw ang kagamhanan sa lungsod sa Carcar sa pagparada sa 400 ka paresan sa mga kaluha nga anaa manimuyo sa maong malambuong lungsod sa habagatan karong Nobiyembre 19.

Dakong paabuton kining maong kalihukan sa maong lungsod. Usa kini ka talagsaong kalihukan nga wala pa mahunahunai sa ubang mga lugar sa nasud.

Mahimong pagatawgon kini og Twin Festival tungod kay sentro sa kalihukan ang pagparada sa mga kaluha. Mahimo usab diha sa maong kalihukan ang pagpasundayag sa unsang mga butang nga kaya kaayong himuon sa managkaluha -- bata man o tigulang -- aron makita sa kadaghanan unsa diay ang kinabuhing kaluha.

Si Mayor Patrick Barcenas sa maong lungsod nakahunahuna niini tungod kay matud niya ilang nabantayan nga daghan og kaluha nga mga residente ang Carcar.

Kun mahinayon, mahimo na usab kining kalihukan nga posibleng mahimo nga "tourist attraction" sa lalawigan nga angayang suportahan sa kagamhanan sa lalawigan sa Sugbo ug sa Department of Tourism, kang kansang kalihim, Secretary Joceph Ace Durano, naka-asawa sa kaluha sa asawa sa iyang igsuon nga si Kongresista Ramon "Red" Durano sa ikalimang distrito sa lalawigan.