Leksiyon sa kapolisan

Wala na gyuy batasan kining atong mga magbabalaod. Dili na motuman og desenting proseso.

Kagahapon sa hapon, gipanglabay sa mga kongresistang sakop sa oposisyon ang mga papel ngadto sa ibabaw dungan ang pag-walkout sa dihang adunay kongresista nga misang-at og mosyon nga i-adjourn (tapuson) ang House Justice Committee hearing sa impeachment complaint batok ni Pres. Arroyo, apan wala pamatia sa chairman.

Wala na gyud kitay kalahian sa mga magbabalaod sa mga nasud sa Taiwan, India ug uban pang mga nasud sa Asya nga mahimo kaayo nila ang panagsinukmagay taliwala mismo sa ilang session hall.

Ang wala pa gyud nako ma-uyoni sa footage sa telebisyon ang sobrang pagpa-papel ni Susan Roces.

Didto gayod siya sa sulod sa dihang nahitabo ang kagubot.

Siyay gipunting sa mga kamera sa telebisyon atol sa iyang pag-uban sa oposisyon nga nang-walkout.

Sa akong nakita, tataw kaayong plano na daan sa mga kongresista sa oposisyon nga ipanglabay nila sa ibabaw ang mga papel sa higayon nga malupig sila sa lalis atol sa hearing.

Kay kun dili pa plano nila ang walkout ug paglabog sa ibabaw sa mga papel, usa o duha lamang kanila ang mobuhat sa ingon. Apan sa akong nakita, daghan kanila ang nagbuhat sa ingon.

* * *

LUOY. Dili ko mo-uban nianang pipila nga misaway'ng danghag ra kadtong duha ka polis nga napatay sa usa ka giingong liso og pangisip atol sa pagresponde niini og kagubot sa Nivel Hills.

Luoy pud kaayo silang PO2 Oliver Jamboy ug PO2 Armando Juego, kinsa napatay ni Prudencio Borres, kun ato pa gyud silang sawayon.



Angay pa gani silang saludohan tungod sa bayanihon nilang buhat.

Namatay sila tungod sa ilang pagserbisyo kanato.

* * *

HAMBOG. Kun akoy pasultion, hambog ra pud kaayo kining ubang mga polis, ilabi na kanang mga sakop sa Crime Suppression Unit (CSU).

Makadaghan na gyud ko makatayming nga bisan walay alarma, kanunay'ng gitakin ang gipamub-an nilang armalite rifle.

Daghan na pud nga higayon nga bisan magmaneho o mag-angkas og motorsiklo ang polis, gisambilay gyud ang armalite rifle. Grabe!

May higayon nga moresponde sila og alarma, bisan protection alarm o family trouble, bitbit gyud nila ang armalite. Mura gyud og manulong og gubat, nga labing taas ug kuyaw nga hinagiban sa kagubot sa pamilya, pinote ra man gyud.

Adunay away sa pamilya nga pusil ang dad-on pero respondehan og duha ka polis nga pulos de-armalite, dili na pud na mao.

Sa akong gamay'ng nahibaw-an sa tactical operations base sa atong mga nabasa, kinahanglang sayran sa kapolisan ang kapabilidad sa tawong ilang respondehan.

Gisulti ko kini kay nahibalo kong nasayod ang kadagkuan sa kapolisan nga dili sa tanang higayon magamit ang armalite.

Mahimo natong mapananglit ang nahitabo nilang Jamboy ug Juego. Nasayod silang family trouble ang alarma, gibitbit gyud nila ang armalite.

Tingale, kun nahitabo pang wala magdala og armalite si Juego, makasukol unta siya sa nilayogay tali ni Borres. Makabunot unta siya sa iyang .38 kalibre nga sidearm.

Sumala pa sa mga nakasaksi, paglayog ni Borres ngadto kang Juego, sa dayong pagkatumba, pulos sila nag-inilogay sa armalite, hangtod nakahigayon paghulbot si Borres sa sidearm ni Juego ug maoy gipusil ngadto sa ulo sa polis. Ang nagsunod nga utro pud nga wala magbantay, napusilan hinuon ni Borres. Nakabalos hinuon siya og pusil kang Borres.

* * *

LEKSIYON. Maayong himuon nang leksiyon sa mga polis ang nahitabo nilang Juego ug Jamboy.

Usa sa dakong sayop nilang duha mao ang pagtinagsa og sulod dasdas ngadto sa lugar nga nagkagubot.

Nasayod man gyud ang mga polis ba nga importante kaayo ang "buddy system." Ang mag-partner nga polis responsable sa matag usa kanila.

Apan dinhi, abi armalite naman ang bitbit, kompiyansa na kaayo sila.

Bisan laslason makadaghan og blade ang lawas sa polis nga magbitbit og armalite, ang polis maglisud gihapon sa pagbalos pinaagi sa pagpusil gamit ang armalite.

Ang akong punto mao: dinhi sa Sugbo dili advisable ang tag-as nga armas. Igo na ang .45 kalibre, .99mm o .38 kalibre nga rebolber.

Maayo lamang kanang armalite kun manulong og gubat o mohimo og operasyon nga ang subject nagbaton usab og armadong private army ug kanang mga drug pushers kay basin pud og atakihon sa mga silingang nakapahimulos sa maong negosyo.

Kasagaran sa alarma dinhi sa Sugbo igo mga protection alarm, adunay pipila nga armed person, pero pistola ang labing powered nga hinagiban nga gidala.

Wala pa ko makadungog nga adunay alarmang girespondehan ang kapolisan nga ang ilang gigukod armado og M16 armalite rifle, carbine, M60 machine gun, ug uban pang high-powered firearms.

Kun unsay armas sa respondihan, mahimo ra man tugbangan. Sa gawas sa nasud batuta ra man gani ang dad-on sa mga polis, nga nasayod gyud silang matag tagbalay didto nagbaton og mga armas kay wala kini idili sa ilang balaod didto.

Dili pud ko moingong ibilin na lang sa mga polis kanang mga armalite nga gipamub-an. Mahimo kana nilang ireserba sa mga dagkong operasyon.