EDITORYAL - Bahala na'g gamay basta naa

Aduna pa gyuy nahibiling pagsalig (trust) ang mga Pilipino ngadto kang Pres. Gloria Macapagal-Arroyo.

Katapusang survey sa Social Weather Stations ngadto sa 526 ka mga respondents sa Metro Manila nga gitawgan sa telepono sukad Hunyo 28 hangtod 30, nagpakita nga may nahibilin pang pagsalig ang mga tawo sa pagka-pamuno nasud ni Arroyo.

Sa survey, 17 porsiyento may hugot pang pagsalig ni Arroyo, samtang 48 porsiyento ang nabinlan na lamang og gamay'ng pagsalig kaniya. Maayo na lang! May nabinlan pa gyud og gamay'ng pagsalig ang mga tawo ngadto kaniya bisan sa kontrobersyal nga "Hello Garci" tape.

Nagtuo kita sa panultihon nga "bahala na'g gamay, basta naa." Sa ato pa, bahala na'g gamay ang pagsalig, basta naa pa'y pagsalig."

Mga 59 porsiyento nagtuong nanikas si Arroyo sa miaging eleksiyon mao nga naka-usa ka milyon nga mayoriya kini batok sa iyang kaatbang nga si anhing Fernando Poe Jr., samtang 29 porsiyento lamang ang nagtuong ang pagpanawag ni Arroyo ngadto kang Comelec Commissioner Virgilio Garcillano Jr. atol sa national canvassing igo lang nagprotehir sa iyang mga balota.

Apan, nagkalainlain ang reaksiyon sa mga respondents sa pangutanang "unsay angay buhaton" karon? Mga 20 porsiyento miingon nga sirad-an na kini nga "chapter" sa politika, 18 porsiyento miingon nga imbestigaron ug pangitaon ang kamatuoran, 18 porsyento miingon nga angay'ng mo-resign na si Arroyo, ug siete porsiyento miingong i-impeach siya. Makita sa resulta sa survey nga natunga ang sentimento sa katawhan. Bunga kini sa kalibog nunot sa mga nagkalainlaing balita nga mitumaw matag adlaw.

Ang maayong buhaton natong mga Pilipino mao ang pagduko na lang og trabaho ug mag-ampo nga maulian ang nagusbat natong nasud. Isalikway na lang nato ang mga diskusyon nga makasakit lamang sa atong dughan ug makapawala sa atong paglaum pagpuyo niining atong Inahang Lungsod.