EDITORYAL - Kailangan ay isang hepe na maglilinis sa PNP

Mabilis na aksiyon mabilis ang promosyon. Ganito sa Philippine National Police (PNP). Makaraang lusubin ng mga Special Action Force (SAF) ang pinagtataguan ng mga kidnappers sa San Francisco del Monte, Quezon City na nagresulta sa pagkakahuli ng apat na miyembro nito, nagbigay agad ng desisyon si President Gloria Macapagal-Arroyo na nakapili na siya ng susunod na hepe ng Philippine National Police (PNP). Pinili niya si Deputy Director Gen. Hermogenes Ebdane bilang kapalit ni Gen. Leandro Mendoza na magreretiro sa Marso ng susunod na taon. Si Ebdane ang namumuno sa National Anti-Kidnapping Task Force (NAKTAF) na ipinalit sa binuwag na Presidential Anti-Organized Crime Task Force (PAOCTF).

Mula nang buuin ang NAKTAF may ilang buwan na ang nakararaan, ngayon lang sila nagpakitang gilas at nakadakma ng mga kidnappers na matagal nang sakit ng ulo ng pamahalaan. Ang pagtaas ng bilang ng mga kidnappng incidents ang nagtulak kay GMA para ipag-utos na bitayin na ang mga kidnappers na nahatulan ng kamatayan. Naging malaking isyu ang biglang pagbawi ni GMA sa death penalty sapagkat nang maupo siya noong January sinabi niyang walang magaganap na pagbitay habang siya ang Presidente.

Mula nang maupo si GMA, tumaas ang bilang ng mga kaso ng kidnapping at walang magawa ang PNP kung paano ito malulunasan. Naging mabangis ang mga kidnappers na kapag hindi nagkasundo sa ransom money ay pinapatay ang kinidnap gaya ng ginawa sa isang babaing Intsik na walang awang binaril sa ulo.

Kakatwa na nang sumabog ang isyu sa kudeta na tinambalan nang kung sino ang susunod na PNP chief ay biglang rumatsada ang NAKTAF ni Ebdane. Natunugan ang operasyon ng "Esting Gang" makaraang kidnapin ang tatlo katao at hingan ng ransom. Nilusob ang hideout ng mga kidnappers na nagresulta sa barilan at namatay ang isang pulis. Kamakalawa’y nahuli na rin ang umano’y lider ng "Esting Gang" na si Ramon Go.

Kaya naman palang gumalaw ng PNP ay kung bakit ngayon lamang sila nagsagawa ng mahusay na operasyon. Maaari naman pala nilang tunugan at putulan ng sungay ang mga walang kaluluwang kidnappers ay kung bakit ngayon lamang ginawa. Naniniwala kami na magagawa ng PNP na lunasan ang talamak na kidnapping sa bansa. Kailangan lamang na magkaroon ng mabisa at seryosong pamamaraan ang mga namumuno. At sa biglang pagpili kay Ebdane, sana’y siya na nga ang pinunong maglilinis sa mga dumi ng PNP.