Kandilang de-peligro, pari de-bato

Kining nahitabo sa parokya sa lungsod sa Alegria dili lang kay sakit sa bulsa sakit gyud sa panit, ug mas sakit sa kasingkasing sa usa ka inahan human nahiwa ang tudlo sa kamot sa usa pa lang ka tuig nga batang babaye atol sa iyang bunyag ug first birthday pa gyud niadtong Hulyo 5 adlaw nga Domingo.

Makaingon ta nga doble ang selebrasyon sa usa ka pamilya: unang kasaluogan ug bunyag sa ilang gamay’ng anghel. Apan imbes nga grasya ug panalangin ang bitbiton pauli, trauma ug samad man hinuon ang naangkon sa bata. Ang sad-an? Ang glass candle holder nga gi-require kuno sa simbahan nga mapalit sa kantidad nga P80 bisan pa og duna nay dalang kaugalingong kandila ang pamilya.

Kini ang gitawag nato og “no choice” nga patakaran. Kon dili ka mopalit sa ilang baligya, basin dili mahatagan og bendisyon? Apan ang nakapait, kining maong candle holder nga gipugos og pabayad, laktod nga pagkasulti: peligroso! Gihulagway sa inahan nga mura ra og pinutlan nga botelya nga giputos lang og gold coil ang tumoy aron hayahay tan-awon. Karon, kay lagi bata, nakab-ot ang maong bildo. Ayay! Na-hiwa ang tudlo, dako kaayong dugo ang nabanaw!

Apan ang mas nakapasakit ug nakapalabtik niining koluma, dili lang ang hait nga bildo kondili ang bato nga kasingkasing sa nagdumala sa seremonyas. Matud sa inahan, sa dihang gisuwayan niya og padayag ang iyang kabalaka ngadto sa pari human mapakgang ang pagdugo sa samad sa bata, "uga" pa sa uga nga dahon ang reaksyon sa sulugoon sa simbahan. Wala man lang kini nangumusta sa bata, wala man lang kuno nag-sorry ug bisan man lang sa pag ingon nga “get well soon baby atong iampo ang imong kaayohan” mao kini ang gidagum nga mabati sa inahan apan wala gyud mahitabo.

Hain na man ang wali bahin sa pagkamaluluy-on, kaaghop, ug pagka-maayong samaritanhon nga kanunay natong madunggan sa pulpito kada Dominggo? Kon ang mismong nagdala sa pulong sa Ginoo dili makapakita og simpatiya sa usa ka nasamad nga bata sulod mismo sa iyang parokya, asa na man lang dapit daganon sa mga sumusunod ang ehemplo sa Kristohanong gugma?

Sa mga tigdumala sa maong parokya sa Alegria, hinaut nga dili lang ang sensilyo gikan sa kandila ang inyong ihapon. Mas importante ang kaluwasan ug ang pagbati sa inyong mga karnero. Ang kandila mapalong, apan ang samad sa kasingkasing sa usa ka inahan tungod sa inyong kabugnaw, magpabiling nagbaga!

Sa kataposan, giadto nako ang parokya sa Alcantara diin gibiyahe nako og walo ka oras aron makuha ang habig sa pari apan wala gyud man lang moatubang, gipapanghimakak pa ang iyang mga staff ipaingon ko nga naniudto pa kuno siya, syaro wala naman lang ka pangagda, sunod nga staff nigawas niingon nga natulog na siya, ha? Alas dose sa udto natulog na? Subo palandungon nga dunay alagad sa simbahan nga walay pagbati sa isig ka tawo.

Daghan ko mga higala nga pari nga mga buotan man dako kaayo og kasing kasing sa mga tawo nga nagkinahanglan, mga friends nga pari basin inyong mamaymayan ni Maymau Magbalantay si Pader.