Harley Davidson 2012, Core+ 2018 mibalik sa SHAABAA division finals
CEBU, Philippines — Ang defending champions Harley Davidson Batch 2012 ug Core+ Batch 2018 mikumpleto og 2-0 sweep sa ilang mga karibal aron pagtikang og balik sa division finals sa Sacred Heart Ateneo Alumni Basketball Athletic Association (SHAABAA) Season 29 didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, siyudad sa Mandaue.
Si Dave Wilson Yu mikadlit og 18 puntos ug 18 ka rebounds nga double-double uban ang upat ka assists, duha ka steals ug usa ka block samtang si Adven Jess Diputado mikulit sab og 18 puntos nga iyang gisukipan og pito ka rebounds ug walo ka assists sa dihang gitagak sa Batch 2012 ang Nest Workspaces Batch 2013, 75-67, aron palig-onon ang ilang kampanya nga makasagunson og korona sa Division B.
Midugang si Julius Cadavis og 17 puntos, 15 ka rebounds ug duha ka assists alang sa Batch 2012, nga makigharong sa Hatch IT Solutions Batch 2010 sa best-of-three finals sugod karong Domingo, Hulyo 12.
Ang Batch 2010 miabante human gipalagpot ang '04 For the Win Batch 2004, 79-76, luyo sa hait nga kombinasyon nilang Gabe Branzuela ug Jasper Diaz. Si Branzuela mipabuto og 29 puntos uban ang upat ka rebounds ug unom ka assists samtang si Diaz miharos og 22 puntos ug 14 ka rebounds.
Sa Division C, ang Batch 2018 mipaduol og usa ka tikang ngadto sa pagdepensa sa ilang trono human gipalagpot ang FADI Batch 2021, 101-75.
Si Benedict Andre Chua maoy nangu sa balanseng opensiba sa Batch 2018 bitbit ang 22 puntos, upat ka rebounds, duha ka assists, ug duha ka steals.
Nanghugyaw sab si Christian Manaytay uban ang 16 puntos, unom ka rebounds ug lima ka assists. Si Patrick Wilson Yu mipupo og 15 puntos, 12 ka rebounds ug lima ka assists samtang sila si Lyder Kent Canieso ug Andrew Vincent Velasco mihipos og 12 puntos matag usa aron bitaron ang Batch 2018 ngadto sa kampiyonato batok sa BRX Batch 2015, nga nakaabot sa finals human gipabakasyon ang Batch 2014, 84-68.
Si Lorenzo Otero maoy nangu sa Batch 2015 uban ang 23 puntos, 12 ka rebounds ug lima ka assists samtang sila si Chaz Cokaliong, Janjan Jaboneta ug Anton Chua nagkumboya'g 35 puntos.
- Latest
