Pagbanhaw sa katarung
Mabanhaw pa ba ang kampanya sa pagpaningil sa labing dagkong kawatan sa ?1.7 trilyones nga flood-control scandal? Wala tumana ni Presidente Ferdinand Marcos Jr. sa pagpapriso sa mga kongresista ug mga senador sa wala pay Pasko sa niaging tuig. Wala nay gitakda nga mga protesta batok sa eskandalo. Unsaon pagpukaw ang pagpakabana sa katawhan?
Ang ka wala nay lapad nga mga protesta wala magpasabot nga napawong nang interes sa mga magbubuhis. Abunda ang mga timaan nga wala sila makalimot ug nga ang mga kurakot dili nila palutson.
***
Bisan sa mga diskusyon sa impeachment proceedings ni Bise Presidente Sara Duterte sa House Justice Committee, duna gihapoy mosal-ot pagpahinumdom nga dili angayng pasagdan ang mas dagkong mga kaso sa kawat.
Tinuod nga ang ?612.5 milyones sa confidential funds nga giingong gibolsa ni VP Sara wala ra sa kumingking sa trinilyon ka pesos nga gisurikbot sa mga opisyal sa gobyerno ug mga kontraktor. Pero ang pagbisto sa mga kawatan dili angay nga mag-agad sa gidak-on sa nakawat. Kinahanglan silang silotan. Ma-Marcos, ma-Duterte, o bisan unsa pay ilang mga ngalan.
***
Dili mahimong hunungon ang impeachment trial ni VP Sara tungod sa gubat sa Iran o kay wala pay mas dagkong isda nga nasakpan. Dili sab mahimong unya na susihon ang mga pasangil sa pangawat ni Marcos Jr. kon maseguro nga dili na makapuli niya si VP Sara.
Atong kasuko sa pagpangawat dili angayng ipasikad sa politikanhong mga baruganan. Hinaot nga ang samang determinasyon sa pagkonbikto ni VP Sara mao say ipahamtang sa mga alyado sa administrasyon.
***
Kon nagtuo si Marcos Jr. nga naabtikan niyang mga grupo nga nagdumili pag-awhag sa iyang resignasyon sa kahadlok nga magkagubot ang nasud kon si VP Sara ang mopuli sa Malacañang, puwerte niyang sayopa.
Mahimo ra g’yung magkahiusa ang katawhan sa pagpalagpot nilang duha. Naabtan ang mga Pilipinhon og 14 ka tuig una nipalayas sa diktadura ni Marcos Sr. Giagwanta nila ang unom ka tuig nga kahawod ni Rodrigo Duterte ug duha ka tuig sa UniTeam. Dili hangtod sa hangtod sila nga mag-agwanta ug mangiyugpos lang sa mas makalilisang pa nga kinawatay ug abuso sa gahom.
- Latest
