Kabalaka ni Cory

Naka-interview ko ni Presidente Cory Aquino sa programang Arangkada sa DYAB dihang nangampanya siya para sa kandidatura pagka senador sa iyang anak nga si Noynoy Aquino niadtong 2007. Human sa interview, nananghid ang iyang staff kon mahimo bang makigsulti nako ang kanhi presidente human sa programa.

Duha ang iyang tuyo. Duna siyay gasa para sa akong asawa (jigsaw puzzle sa usa sa iyang paintings) ug pangutana para nako: Tinuod ba ang nadunggan gikan sa iyang mga higala sa Sugbo ug kon tinuod unsa man ang rason nganong dugay kong nagminyo?

-o0o-

Ang biyuda sa nasudnong bayani nga si Ninoy Aquino, nakapukan sa diktadura, nakapalayas sa mga Marcos gikan sa Malakanyang ug nakabanhaw sa demokratikanhong mga institusyon sa Pilipinas interesadong mahibawo nganong naabtan kog 39 anyos una nagminyo?

Sa wala pa kong kahunahuna og nagkalainlaing mga ideya, nipasabot siya: Nabalaka nga ang iyang bugtong anak nga lalaki (nga 47 na niadtong higayona), bisan human nakaangkon og daghang mga hinigugma, wala pa magminyo; nanghinaot nga maka-rekomendar ko og mga paagi unsaon sa pagdasig si Noynoy sa pagsugod na og iyang kaugalingong pamilya.

-o0o-

Sa wala pa kong katubag, nakakita tingali nga wala koy kalainan sa ubang mga sakop sa media nga ganahang makalili sa mga sekreto sa iyang anak, gihatagan ko niya og bonus:

Sa tanang hinigugma sa iyang anak, iyang giisip si Korina Sanchez nga labing guwapa. Pero nahadlok nga makaluluoy si Noynoy kon silay nagkadayon (bisan nagbuwag niadtong 1990 nagpabiling managhigala silang Noynoy ug Korina, gani si Noynoy ang maninoy sa kasal nilang Mar Roxas sa 2009).

-o0o-

Akong giingnan si Cory Aquino nga akong trabaho sa media ug mga pasyente sa akong asawa maoy rason maoy nakalangay namo pagminyo. Mabalak-on ang iyang dagway. Nakatugkad sa mas dakong responsibilidad sa iyang anak.

Namatay si Cory kapin duha ka tuig human sa interview. Napugos si Noynoy pagdagan ug nidaog pagka presidente sa 2010. Daghan pa siyang nisunod nga mga hinigugma ug padayong nangandoy nga ikatagbo nang mamahimong inahan sa iyang mga anak. Pero tungod sa higanteng responsibilidad pagpangulo sa nasud ug sa dili pagpakauwaw sa iyang mga ginikanan ulitawo si Noynoy nga namatay sa pangedarong 61 niadtong 2021.

[email protected]