Dili na iya ang Kongreso
Dili lang kausa kon dili kaduha g’yud ka higayon nga ang tingog ni Bise Presidente Sara Duterte Carpio maoy giagad sa mayoriya sa mga kongresista sa pagpili sa ilang pangulo. Siya maoy nagbuot kinsay molingkod nga speaker sa House of Representatives niadtong 2018 ug niadtong 2020.
Talagsaon ang iyang influencia. Kay isip mayor sa Davao City niadtong mga tuiga, layo ra kaayo siya sa sentro sa gahom sa nasudnong gobyerno. Pero ang iyang kahawod isip anak ni kanhi presidente Rodrigo Duterte maoy nakapalubay bisan sa labing tang-an nga mga politiko.
* * *
Ang duha niya ka mga biktima pulos walay nahimo sa pagsukol:
• Si kanhi speaker Pantaleon Alvarez gipalagpot ni kanhi presidente ug hangtod karon Kongresista Gloria Macapagal Arroyo niadtong 2018 ug wala na g’yud kaugpo og balik (nibalik na og amen sa mga Duterte pinaagi sa pagkuyog sa ilang Maisug rallies); ug
• Si kanhi speaker ug karon Senador Alan Peter Cayetano nisuway pero napakyas pagbabag sa pagpuli ni Kongresista Lord Allan Velasco ug usa sa nisuporta sa budget hearing sa Senado sa iyang gipangayo nga mas dakong budget sa 2025.
* * *
Lahi na kaayo ang House nga naabtan ni Carpio sa iyang pag-atubang sa Appropriations Committee niadtong Martes, Agosto 27. Ang makabungog nga mayoriya tua na kapusta sa giilang mortal niyang kaaway --iya ganing gibalikas nga tambaloslos-- nga si House Speaker Martin Romualdez.
Maoy hinungdan nga imbes mangandam sa pagtubag sa ilang mga pangutana giunhan niya sila sa pagpasangil nga nagplano na sa pag-impeach niya ug gisundan sa pahibawo nga dili siya motubag sa ilang mga pangutana.
* * *
Gikan sa mayoriya nga nagyangu-yango niya niadtong 2018 ug 2020, tulo na lang ka kongresista ang nisuporta niya niadtong Martes. Gipangulohan ni kanhi presidente Arroyo nga kaduha na gi-demote human gipasanginlan nga nagplano pagkudeta ni Romualdez. Wala gani pakita ang iyang igsuon nga si Kongresista Paolo Duterte.
Gawas nga napakyas ang iyang mga alyado pagbadlong sa mga kongresista nga nag-piyesta sa pagkuti-kuti sa iyang budget ug confidential funds, walay bisan usa nila, apil na si Arroyo, nga nisupak sa desisyon sa komitiba pagsuspenso sa deliberasyon. Maong kinahanglan siyang mobalik og atubang sa mas andam na nga House unya sa Septiyembre 10.
- Latest
