Mga delegado gikan sa Russia gisuroy sa mga tourist spot sa Sugbo
CEBU, Philippines — Gawas sa pagtambong sa Cebu Tourism, Health and Business Summit, ang 20 ka delegado gikan sa Saint Petersburg sa nasud sa Russia nakasuroy usab sa pipila sa giilang tourism destination sa habagatang bahin sa lalawigan sa Sugbo.
Apil sa giadto sa mga bisita ang Nuestra Señora del Patrocinio de Maria Parish Church sa lungsod sa Boljoon niadtong Agosto 24 kon diin nasinati nila ang tradisyonal nga pamahaw sa mga Sugboanon.
Nasinati usab sa mga delegado ang whale shark watching sa Barangay Tan-awan sa lungsod sa Oslob nga usa sa mga sikat nga lugar nga adtoon sa mga langyaw nga turista sa Sugbo.
Apil usab nga gibisita sa mga Russians ang 18th century nga St. Michael Archangel Parish Church sa Argao ug dayon nag island hopping ug sardine run sa lungsod sa Moalboal.
“This memorable encounter allowed them to witness the awe-inspiring presence of whale sharks up close, an experience they eagerly described as unforgettable” matud sa Kapitolyo.
Gawas sa heritage tour ug ubang pagsuroy sa Southern Cebu, misaksi usab ang maong mga delegado sa Pasigarbo sa Sugbo kagahapong adlawa sa Cebu City Sports Center kon diin nakita sa mga bisita ang kasadya, kultura sa mga Sugboanon pinaagi sa nagkadaiyang festivals sa mga contingents gikan sa mga lungsod ug siyudad sa Probinsya sa Sugbo. (BANAT NEWS)
- Latest
