Nikalit og tak-om

Labihan kamalampuson sa taktika sa Philippine Coast Guard (PCG) sa pag-dokumento sa tanang pagpanghasi nga gihimo sa mga barko sa China batok nila nga ang kadagkoan mismo sa Foreign Ministry sa Beijing nireklamo sa ilang kasulti nga mga opisyal sa State Department sa Estados Unidos.

Ang assertive transparency policy nilampos pagpahibawo sa tibuok kalibotan unsa kabagis, ka-abusado ug kabastos ang mga puwersa sa China sa pagsuway pag-ilog sa West Philippine Sea (WPS) nga klarong dili ila base sa international law ug sa arbitral ruling sa 2016 nga pabor sa Pilipinas.

* * *

Maong makapakugang nganong nikalit lang og tak-om ang administrasyon ni Presidente Ferdinand Marcos Jr. sa engkuwentro sa mga barko sa Pilipinas ug China atol sa resupply mission sa Ayungin Shoal niadtong sayong buntag sa Lunes, Hunyo 17.

Gawas nga ang China maoy unang nakapahibawo sa insidente, hangtod sa akong pagsuwat ini, duha ka adlaw na human sa engkuwentro, wa pay klaro nga mga detalye ang Malakanyang sa gikatahong pagka-angol sa pito ka sundawo (apil ang usa nga naputlan og tudlo) ug pagkasakmit sa walo ka high-powered nga mga armas.

* * *

Usa sa posibleng katin-awan sa kalit nga pagpakahilom mao nga ang operasyon iya sa Armed Forces of the Philippines (AFP), di sa PCG. Tingali mas baga ang sapaw sa burukrasya sa AFP kay sa PCG nga paspas nga naka-detalye uban ang video ug letrato sa social media platforms sa nangaging mga insidente.

Wa sab sunda sa AFP ang gihimo sa PCG nga pagpakuyog sa mga sakop sa lokal ug langyaw’ng media aron mas daghang maka-dokumento ug mas lapad ang pagpakatap sa kasayuran.

* * *

Maglisod ba pagpasabot ang AFP nganong napakyas ang ilang paghatod sa pagkaon ug ubang suplay ngadto sa kasundalohan sa BRP Sierra Madre sa Ayungin Shoal? Mauwaw ba silang moangkon nga naabtikan sila sa mga sakop sa China Coast Guard (CCG) nga gikataho nga:

• Nibangga, niguba, nisaka ug niguyod sa mga barko sa Pilipinas;

• Niilog sa mga armas nga gitagoan sa rubber boats (gidid-an ang Philippine Navy personnel pagbitbit sa ilang armas);

• Nibuslot sa usa sa rubber boats;

• Nisakmit sa laing upat ka rubber boats; ug

• Nisamad sa pito ka sundawo.