Kaluod sa politika

Kon madayon ang plano sa politikanhong mga dinastiya, ug kon dasonan sa mga dumadapig ang ilang mga ambisyon, mao ni ang porma sa Senado human sa eleksiyon karong Mayo 12, 2025:

• Tulo ka Duterte (kanhi Presidente Rodrigo Duterte, Kongresista Paolo Duterte ug Davao City Mayor Sebastian Duterte);

• Tulo ka Tulfo (Senador Raffy Tulfo ug iyang mga igsuon nga silang Kongresista Erwin Tulfo ug Broadcaster Ben Tulfo);

• Duha ka Villar (Senador Mark Villar ug ang lingkoranan nga bakantehan sa iyang inahan nga si Senador Cynthia Villar mahimong pulihan sa iyang igsuon nga si Kongresista Camille Villar o sa iyang amahan nga si kanhi Senate President Manny Villar);

• Duha ka Ejercito (Senate President Pro Tempore Jinggoy Estrada ug iyang igsuon sa gawas nga si Senador JV Ejercito); ug

• Duha ka Cayetano (Senador Alan Peter Cayetano ug Senador Pia Cayetano).

* * *

Sa ato pa, katunga (12 sa 24) sa mga senador magrepresentar og lima lang ka pamilya. Kon manakod ang ilang sakit sa pagpatuyang, unsa may makapugong sa ubang mga senador sa pagtangkil sab sa ilang mga asawa, mga bana, mga anak ug mga igsuon aron mas pamilyar pa gyod ang mga dagway nga ikauban sa ilang mga sesyon?

Kon mahitabo ni sa Senado, nga sama sa presidente ug bise presidente kinahanglang pilion sa tibuok nasud, unsay makapugong sa mga politiko sa lokal nga mga puwesto nga mas sayon dag-on sa pagpadagan ug pagpadaog sab sa tibuok nilang mga pamilya?

* * *

Pasiunang bersiyon ining maong eskandalo nahitabo na sa nagkalainlaing ang-ang sa lokal ug nasudnong gobyerno. Ang pahibawo sa mga Duterte nga tulo nila ang mag-senador mao lay pagpalapad sa kalang-og. Kay nakapugong sa mga dinastiya pagpamugos sa mas daghan nilang mga sakop mao rang kaikog nga, sama sa kauwaw, nagkanihit na sa pamolitika.

Manguros na lang tang daan kon makaamgo ang dinastiya sa mga Garcia sa Sugbo nga ang busdik nilang makinarya makadaog og mas daghang lokal ug nasudnong nga mga puwesto. Hinaot nga ang pag-abuso sa kataposan makapukaw sa ilang mga kaatbang pagtanyag og mas maayong alternatibo. Ug hinaot makapapugwat sa mga botante nga kinahanglan silang magpili og mas takos ug mas tarung nga mga lider.