Misteryo ni Alice Guo
Isip negosyante, labihan kamalampuson ni Bamban, Tarlac Mayor Alice Guo:
• Dako ang kita sa iyang babuyan nga nakapalit siya og helikopter (wa niya itug-an ang presyo pero tag P28 milyones ang usa sa kinabaratohan nga makuha sa Pilipinas);
• Nakumbinser niya ang grupo sa mga negosyante nga taga China sa pagtukod og multi-milyones pesos nga buildings ug mga negosyo nga dunay gatosan ka trabahante sa kapin sa pito ka ektarya niyang yuta; ug
• Dato sang iyang mga higala, usa nila nipahuwam niya og P33 milyones nga awtong McLaren aron lang ipa-ibog.
* * *
Di hinuon siyang kamao nga mopili sa iyang mga kasosyo:
• Kauban niyang incorporators a Baofu Land Development Inc. nakonbikto og mga kasong kriminal sa Singapore ug ubang kanasuran;
• Iyang gitabangan nga Philippine Offshore and Gaming Operator (Pogo) nga Zun Yuan Technology Incorporated gironda sa Pebrero 2023 ug Marso 2024 kay gipasanginlan og human trafficking, scamming ug hacking sa websites sa mga ahensiya sa gobyerno; ug
• Gipasanginlan ni Senate President Pro Tempore Jinggoy Estrada ang iyang kapuyo nga opisyal sab sa gobyerno nga mao ang tinuod nga operator sa Pogo.
* * *
Iyang pagkumpisal nga katabang nga gipaangkan sa iyang amahan ang iyang inahan, nga nibiya ug wa na pakita, nakapatumaw og mas daghang pangutana sa iyang pagkatawo. Wa siya mopakita og interes pagsusi kon nibiya bang iyang inahan o gipalayas sa iyang amahan. Wa sab mopasabot nganong wa mangita sa wa pa mag-12 anyos (kanus-a gitug-anan sa iyang amahan sa ngan sa iyang inahan).
Nagsugod og pangita sa inahan pagdaog na pagka mayor sa 2022. Pero di tungod sa kamingaw. Kon dili aron kapamatud-an ang iyang Filipino citizenship.
* * *
Labing talagsaon ang iyang kakalma: Pagtubag sa mga pangutana sa Senado; paglikuliko sa iyang sulti; bisan sa pag-usab sa importanteng mga detalye (unang tubag nga Pilipino ang iyang amahan, dayon na-Chinese citizen na sab); ug bisan sa iyang mga paghilak.
Kon tinuod nga wa siyang kataak sa eskuylahan, nga sa tutors nga niadto sa ilang babuyan nakat-on pagsuwat, pagbasa ug pagkuwenta, angay’ng maghinuktok silang Bise Presidente ug Education Secretary Sara Duterte Carpio ug kaubanan sa Department of Education: Posibleng mas maayo ang kalidad sa edukasyon sa gawas sa eskuylahan.
- Latest
