Pagbudhi sa mga Duterte
Dihang nabisto sa niaging semana nga gitam-okan sa China og patay nga coral aron tukoran og artificial islands ug military bases ang features sa West Philippine Sea (WPS), wa siyay sulti. Dihang gitaho sa Unicef nga duha ka milyon ka bata sa Pilipinas ang way tarung nga pagkaon, wa siyay tingog.
Dihang nipagawas og sinuwat nga pamahayag sa niaging adlaw, wa mopadayag og kabalaka sa pagkagusbat sa WPS. Wa say sugyot unsaon pagsulbad ang malnutrisyon. Gisaway hinuon niyang nasobrahan nga puwersa sa kapolisan pagronda sa mga teritoryo ni Apollo Quiboloy.
* * *
Si Bise Presidente Sara Duterte Carpio nangopya sa sinuwat sang pamahayag sa iyang amahan nga si kanhi Presidente Rodrigo Duterte. Para sa amahan ug anak mas importante ang kaluwas ni Quiboloy kay sa pagpreserbar sa WPS ug pagtarung sa pagkaon sa mga bata.
Bahala na kon nasobrahan ang puwersa sa China sa WPS, basta di lang paabton og kapin gatos ang mga polis nga mangita ni Quiboloy. Bahala na kon peligrong mangamatay ang malnourished nga mga bata, basta di lang mapukaw og kadlawong dako ang mga dumadapig ni Quiboloy.
* * *
Mas hilas ang pasangil sa kanhi presidente batok sa administrasyon ni Presidente Ferdinand Marcos Jr. nga nangyatak sa labing batakan nga mga katungod sa katawhan nga gipasanginlan pero wa pa kapamatud-i nga nakahimo og krimen.
Nakalimot si Duterte sa kapin 30,000 ka Pilipino nga wa ikiha ni luwati og arrest warrant pero laktod nga gipamatay sa iyang kampanya sa drugas. Nataligam-an sab niyang 178 ka eskuylahan sa mga Lumad sa Mindanao nga iyang gipa-kandadohan ug gipa-bombardiyohan.
* * *
Labihan kabakikaw ang postura sa mga Duterte nga nabisto na hinuon ang tinuod nilang baraha:
• Ilang kapakyas sa pag-awhag ni Quiboloy sa pagsurender ug pag-atubang sa mga kasong kriminal batok niya dinhi sa Pilipinas ug sa Estados Unidos maoy pagdupa sa iyang pagtagu-tago ug pagpagamit sa ilang influencia sa padayon nga pagsabotahe sa gahom sa gobyerno sa pagpatuman sa mga balaod; way kalainan sa
• Ilang kapakyas sa pagsaway sa bangis nga pagpanghasi sa China sa WPS, puno sa pagsud og sekretong kauyonan sa kanhi presidente, maoy pagsuporta sa pagpangilog sa China sa atong nasudnong teritoryo.
- Latest
