Reklamo sa bahawng SkyFlakes
Sa akong pagreklamo sa duha ka sunudsunod nga pagkabiktima sa bahawng SkyFlakes, wa ko magpaabot nga dunay mahitabo. Naibawo kong mopalit lang gihapon og SkyFlakes uban ang panghinaot nga maka-tayming na og dili hungaw.
Usa ka viewer sa akong programa sa YouTube ug Facebook nipasalig nga kon mapakita ang resibo ilisan ko og bag-o. Nalabay nang resibo. Nakahunahuna nga mosuway sa Rebisco ug ubang crackers nga girekomendar sa pipila ka viewers. Pero nanugon lang gihapon og SkyFlakes. Mas gamay na lang putos aron di lisod hutdon kon bahaw na sab.
* * *
Maong puwerteng kuganga nako pag-abli sa GMail (nga tagsa na lang himuon human niretiro) niadtong Huwebes: Nagpaabot ang mensahe sa sa Monde Nissin, ang tighimo sa SkyFlakes, nga pinetsahan og Agosto 15, Martes, samang adlaw sa pagreklamo.
Ambot duna bay trabahante nilang nakatsamba og tan-aw, o may viewer nga nanawag sa ilang Customer Care, gipadala ang email sa alas-3:05 sa hapon, walo ka oras human sa programa. Gipangayoan ko nila sa personal nga mga detalye, asa ug kanus-a napalit, expiry date, code, ug letrato sa produkto.
* * *
Usa ka adlaw human sa akong tubag, ni-email sila nga dunay manawag sa akong telepono aron mangayo og dugang kasayuran. Tagalog ang nanawag, nangayo og pasaylo sa akong kasinatian sa ilang produkto ug gipaasoy pagbalik ang tanang detalye.
Gipahibawo kong ilang mga representante sa Sugbo moduaw sa among pinuy-anan aron pagkuha sa nahibiling SkyFlakes aron ilang masusi unsay problema. Gibalibaran nakong ilang tanyag nga ilis. Kay bisan bahaw gikaon man gihapon nako.
* * *
Kay kinahanglan mang ipreserbar ang labing uwahing napalit, gipangayo nakong SkyFlakes sa bag sa akong asawa nga bawnon sa sakyanan panaganang magutman kon matanggong sa trapiko. Septiyembre 2023 ang expiry. Pero mas kagumkom kay sa bag-o nga Disyembre 26, 2023 ang expiry date.
Hinaot Bisaya ang taga Monde Nissin nga mokuha sa salin. Aron madabudabohan og pangutana ingon ini ba sila kabuotan sa tanang nireklamo, di ba mapabag-an aron di dayon magisi ang ilang putos ug unsay mga timaan sa lab-as ug bahawng SkyFlakes. Pasayloa, Rebisco ug ubang crackers, di lang una ko mobalhin. Gawas kon bahaw na sab simbako ang sunod nga mapalit.
- Latest
