Diskurso ni Sara
Ang diskurso ni Bise Presidente Sara Duterte sa Philippine Chamber of Commerce and Industry (PCCI) 52nd Philippine Business Conference and Expo sa Manila Hotel niadtong Martes maoy unang pormal niyang mensahe ngadto sa dagkong mga negosyante sa nasud human nideklarar sa iyang kandidatura pagka presidente niadtong Pebrero 18 ning tuiga.
Si VP Sara liwat sa iyang amahan: Dili kamao mobasa og diskurso. Si kanhi Presidente Rodrigo Duterte sigeng kapandol ug naglisod pagsubay sa teleprompter. Gitinuod og basa ni Sara ang sinuwat sa speechwriters. Pero uga, morang estudyante nga nag-recite:
-o0o-
Sayop ang linya nga mahimo siyang ma-presidente pero mahimo sab nga dili ma-presidente sa 2028. Nagpasabot kini nga, walo ka buwan human sa deklarasyon sa kandidatura, wala siya magpaabot nga makadaog.
Nagsugod pinaagi sa pagklaro sa iyang tuyo, “To set the bar high for empowerment,” ug nitapos sa pag-ingon, “The bar has been set high.” Gipresentar ang iyang kaugalingon nga mao ang sukdanan sa excellence ug tinubdan sa empowerment. Mora siyang nipikpik sa iyang abaga ug niawhag sa mga negosyante sa pagpakpak sa iyang kangilngig.
-o0o-
Unsa man iyang gipasabot sa setting the bar high? Wala nay pagbolsa sa confidential funds? Wala nay laag-laag sa ubang kanasuran? Wala nay P205 mil nga panihapon sa Ginza sa Tokyo? Wala nay P600 mil nga shopping sa Nike sa Davao ug Malaysia? Walay mangulata og court sheriff? Walay manghulga nga ipapatay ang iyang politikanhong mga kaatbang? Walay manghudlat nga ugkaton ang patayng lawas sa Libingan ng mga Bayani aron ilabay sa West Philippine Sea?
Panalipdan ang nasudnong teritoryo imbes mamugos og Mandarin aron pagsipsip sa China? Motarung pagpanalipod sa iyang budget? Dili mo-kolekta og suweldo sa Davao City Hall patong sa iyang suweldo pagka bise presidente? Dili mangontrata og catering business uban sa iyang manghod nga mayor?
-o0o-
Niingon nga ang ugma sa Pilipinas “should never depend on whether one person becomes president” pero gihanigan sa mensahe: “What is my purpose… To set the bar high.”
Sama ra nga giingnan ang mga negosyante nga ang ugma naa sa mga kamot sa katawhan. Pero gi-una pagpresentar ang iyang kaugalingon nga mao ang bugtong rason nga, “The bar has been set high.”
- Latest
