Gahom sa gugmang gitipigan

Kining istorya sa gugma nagsugod dihang ang Southern Islands Hospital (SIH), karon Vicente Sotto Memorial Medical Center, duna pay eskuylahan sa Nursing ug dormitoryo sa mga estudyante.

Dunay babayeng estudyante nga labihang guwapaha nga kasagaran sa mga lalaki nga niduaw nilista sa iyang ngan nga maoy ilang tuyo. Duna say lalaki nga intern nga labihang guwapoha nga bisan nahibaw-an nga ang kinaguwapahan ang iyang tuyo ang ubang mga estudyante nag-unahay pakig-istorya niya.

***

Ang babayeng estudyante dugayng nahuman sa pag-areglar sa iyang buhok maong kasagaran inig gawas niya sa kuwarto duna nay laing ka-istorya ang lalaki. Maong nibalik na lang og sud sa kuwarto sa pagtuo nga duna nay laing gipangulitawhan.

Dihang nagkaabot na g’yud sila ug nakahalad na ang lalaki sa iyang gugma, nihangyo ang babaye nga mahimo ba nga managhigala lang sila. Nipasabot nga di una mosud og relasyon kay nakasaad sa iyang mga ginikanan nga motarung og tiwas sa iyang pag-eskuyla.

***

Niligid ang katuigan nga wa na sila magkita. Naminyo ang babaye og laing lalaki. Nanganak og lima pero batan-on pang namatay ang unang bana. Naminyo sa ikaduha, nanganak og usa pero nabiyuda na sab human lang sa 13 ka tuig.

Niduaw sa iyang anak sa New York dihang nakadawat ang babaye sa tawag sa lalaki nga unang nangulitawo niya. Nihangyo nga magkita sila sa Chicago aron duna siyay kuyog pagtambong sa kalihokan sa Filipino community didto.

***

Nisugat ang lalaki sa airport nga way ideya mag-ilahanay pa ba sila human nga wa na magkita sud sa 57 ka tuig. Dihang may babaye nga niwara-wara niya, malipayon nga nilayas ang tanan niyang pagduda. Human sa pila ka adlaw, nananghid sa ilang mga anak nga magminyo. Sa ikatulong higayon. Kay ang lalaki kaduha na sab diay nabiyudo.

Sa niaging tuig, nahibaw-an sa babaye gikan sa mga doktor nga dunay kanser nga nikatap na sa ubang bahin sa iyang lawas. Nihangyo nga di sa Chicago kon dili sa Sugbo igahin ang kataposan niyang mga adlaw. Nahibaw-an namo ang ilang istorya atol sa iyang haya. Taliwa sa daghang buwak ang letrato sa babaye. Nga gibutang sa lalaki sa iyang pitaka sukad sa kataposan nilang panagkita sa SIH.