Di kaaway ang mga nisukwahi
Mangahas ko og sugyot nilang incoming tourism secretary, Liloan Mayor Christina Frasco, Peryodista Raissa Robles, ug Vice President-elect Sara Duterte, nga naglalis sa plano sa pag-abli sa Mindanao para sa turismo, nga ilang konsultahon si Tourism Secretary Berna Romulo Puyat.
Aron mahibawo sila nga hagbay rang giablihan ang Mindanao para sa turismo. Makahatag si Puyat nila sa mga detalye sa iyang mga lakang sa pagdasig sa lokal ug langyaw nga mga turista sa wa pa ang, ug atol sa, pandemya pagdiskubre sa mabulukon nga mga kultura, destinasyon, ug pagkaon sa Muslim Mindanao.
* * *
Masabot ang kakuwang og kasayuran ni Frasco. Wa pa tingali sila magkasulti si Puyat. Ganahan lang tingali siyang mohatag og importansiya sa Mindanao. Isip pasalamat sa iyang kumareng Sara. Nga gawas nga nitudlo niyang tigpamaba atol ug human sa kampanya posibleng maoy nagrekomendar niya sa gabinete.
Tingali natingob ang iyang atensiyon sa Liloan. Maong wa kadungog sa daghang paningkamot pagpalambo sa turismo sa Mindanao nilang Puyat ug nangaging mga tagduma sa turismo. Apil nang labing unang Sugbuanong tourism secretary, iyang silingan sa Danao City nga si Ace Durano.
* * *
Di makiangayon ang pasidaan ni Robles nga angayng mangandam si Frasco sa pagpangunay pakigsabot sa Abu Sayyaf aron pagluwas sa dagiton nga mga turista. Gawas lang kon duna siyay sukwahi nga kasayuran sa pangangkon sa lokal nga mga opisyal sa Basilan ug Sulu nga wa nay nahitabong kidnapping sa ilang lugar sukad sa 2016.
Wa sab unta lahapa ni Robles ang Mindanao. Diyutayng pakisusi motug-an unta niya nga luwas ang turismo sukad pa sa nangaging katuigan sa kinadak-ang bahin sa Mindanao.
* * *
Makapabalaka ang reaksiyon ni Sara. Imbes awayon si Robles, mas maayong palihugon si Puyat pagpasabot unsa kamalampuson ang turismo sa Mindanao. Maayo sang sundon ang gihimo ni Kongresista Shernee Tan-Tambut sa Kusug Tausug Partylist nga pagtanyag nga kyuogan niya si Robles sa Sulu, Tawi-Tawi, ug Zamboanga City.
Hinaot may makahunghong ni Sara nga di angayng isipon nga Davao ang tibuok Pilipinas. Di mahimong ilhon nga kaaway ang mga mopadayag og sukwahi nga opinyon. Mahimo ra g’yung tubagon og tinarung. Nga nakat-onan na unta niya kon niapil pa sa mga debate sa niaging kampanya.
- Latest
