Pagpupho sa mga hugaw sa Sinulog
Natinuod ang kalibog nga gipasidaan nga motumaw kon duha ang tagduma sa Sinulog karong tuiga. Kay nagpalingug-lingog man si Cebu City Mayor Edgar Labella sa negatibong mga implikasyon sa iyang pagtukod sa Sinulog Governing Board (SGB) nga mosubli sa mga lakang sa Sinulog Foundation Inc. (SFI), nagkapuliki siya karon sa pagpamunit sa mga hugaw nga namugna sa iyang salida.
Sukwahi sa gikabalak-an nga pagsapaway sa SGB ug SFI pag-umol og magkasungi nga mga lagda, ang nitumaw nga mga kontrobersiya nanukad sa pait nga kamatuoran nga way nakada og buot sa duha.
***
Nipasalig si Labella nga mas maayo nang pagduma sa Sinulog karong tuiga kay duna nay “check and balance” sa SGB ug SFI. Ang iyang executive order naghatag og gahom sa SGB sa pagtugot sa tanang lakang sa SFI.
Nga di maoy nahitabo. Nabisto sa gikuwestiyon nga mga transaksiyon paghatag og eksklusibong mga katungod sa pribadong mga kompaniya pag-cover sud sa Cebu City Sports Center (CCSC) ug pagpamaligya og pagkaon sa tibuok ruta sa parada nga ang SGB ug SFI pulos nikontrata og managsama nga kompaniya pagduma sa marketing sa Sinulog.
***
Pulos nanghunaw sa ilang mga kamot ang kadagkoan sa SGB ug SFI sa mga kontrobersiya pinaagi sa pagtulisok sa marketing arm nga nasobrahan ra ka-agresibo sa pagpangita og kuwarta aron matuman ang quota nga ilang gitakda --nga malabwan og 12% ang kita sa Sinulog ni kanhi Mayor Tommy Osmeña sa niaging tuig.
Si Labella, human nidupa sa pagtugot sa usa lang ka kompaniya pag-cover sa CCSC, napugos pag-usab sa kontrata human nagkabulingit sa mga pagsaway sa social media.
***
Mas nangalisbo ang pag-monopoliya sa pagkaon. Gipili sa marketing arm ang kompaniya sa Manila kansang mga produktong baboy di mabaligya sa Sugbo tungod sa ban nga gipahamtang sa usa ka sakop sa SGB.
Way laing kapilian si Labella gawas sa pagpupho sa laing hugaw sa iyang mga sinaligan, apil na sa iyang igsuon nga si SFI executive director Jojo Labella. Kay kon dili, gubot ang negosyo sa pagkaon sa Sinulog: Ipasakmit sa SFI ug SGB ang mga produkto nga karibal sa ilang kinaham nga kompaniya, kansang mga produktong baboy ipasakmit sab sa usa ka sakop sa SGB.
- Latest
