Pagpamugos sa sayop
Ang orihinal nga sayop sa Pantawid Pasada Program (PPP) nga nisanga sa dugang bulilyaso hangtod sa ikaduhang tuig sa pagpatuman ini karong tuiga: Ang paghatag sa operators sa public utility jeepneys (PUJs) sa mga benepisyo nga alang unta sa PUJ drivers nga maoy direktang naigo sa pagsulbong sa presyo sa lana sugod sa niaging tuig tungod sa excise taxes nga gibunal sa Tax Reform for Acceleration and Inclusion (TRAIN) Law ni Presidente Rodrigo Duterte.
Kon di usbon, mas maayong mangompra na og paracetamol, kay mosamot ang labad sa ulo sa PPP.
* * *
Bisan di angkunon sa Land Transportation Franchising and Regulatory Board (LTFRB), mao ni ang nananga nga kasaypanan sa PPP:
• Nasuko ang mga drayber kay may hakog nga operators nga nibolsa sa benepisyo;
• Bisan ang tarung nga operators naglisod paghatag sa benepisyo kay di permanente ang mga drayber sa ilang PUJs; ug
• Mayoriya sa operators wa pang kakuha sa benepisyo kay naglikay sa kahasol nga nahisgutan sa ibabaw, gawas nga ang uban naghupot og mga prangkisa nga wa pa mabalhin sa ilang ngan kay ang karaang mga tag-iya wa na igkita.
* * *
Ang bag-ong pasidaan sa LTFRB nga di sila makig-transaksiyon sa PUJ operators nga wa pa kakuha sa mga benepisyo mosangpot lang sa dugang kalibog ug kalangay kay wa may mahimo ang operators hangtod nga matul-id sa LTFRB ang nahisgutan nang mga bulilyaso.
Posible gani hinuon nga mas modaghan ang PUJ operators nga ma-kolorum kon did-an g’yud sa LTFRB sa pagsud sa lehitimong mga transaksiyon tungod lang sa bulilyaso nga di nila tinuyoan.
* * *
Mangahas mi og sugyot nga inay paundayonan sa LTFRB ang sayop nilang mga lagda, ipatuman ang PPP pinaagi sa pinili nga gasoline stations nga kasagarang maagian sa PUJs ug may katakos sa pag-apud-apod sa benepisyo pinaagi sa anam-anam nga diskuwento matag patubil sa lana sa tibuok tuig sa PUJ drivers nga makapakita sa ilang lisensiya ug prangkisa.
Kinuha ra ning sugyota gikan sa tumoy sa among buhok. Mahimong palambuon o palabwan sa LTFRB. Ang amo rang punto mao nga dunay mas maayong paagi kay sa pagpakabuang sa pagsige og balikbalik sa sayop ug sa pagpaabot og lahi nga resulta.
- Latest
