Wa nay uminto sa plitehan
Kon makasugat ka og motorista nga tam-is og pahiyom, dako ang kahigayonan nga nakadungog na siya sa balita nga mo-us-os na sab ang presyo sa lana karong semanaha. Mao na ni ang ikapito nga sunudsunod nga pagtidlom sa presyo sa lana dinhi sa ato ug sa ubang bahin sa kalibotan.
Tungod ni sa pagtibugsok sa presyo sa lana sa merkado sa kalibotan sa kinaubsang ang-ang karong tuiga. Nagpadayon ang pagbaha sa suplay samtang gikabalak-an ang pagluya sa ekonomiya sa China ug ang gubat sa patigayon nga gideklarar ni US President Donald Trump.
* * *
Makadugang sa kasibaw sa awhag pagsubli sa gipasakaang plitehan sa mga sakyanang pamasahero ang pagbarato sa lana. Labi na nga ang labing uwahing nidason mao si Transportation Secretary Arthur Tugade.
Kay wa pa may uminto sa plitehan sa public utility jeepneys (PUJs) sa Sugbo ug Central Visayas, mahimong di na lang tagdon sa Land Transportation Franchising and Regulatory Board (LTFRB) ang mga petisyon sa lokal nga transport groups. Mahimo ganing makaangkon na og sukaranan ang pagsubli sa taas nga plitehan sa mga taxi nga hagbay rang gikuwestiyon sa mga pasahero.
* * *
Sa pagtapos sa patigayon sa lana sa niaging semana, nitugsad ang presyo sa lana ngadto sa $60 matag baril. Nga mas ubos og 30% kon itandi sa kinatas-an nga presyo karong tuiga nga $86 matag baril nga nahitabo niadtong Oktubre.
Usa sa nakapapa-ubos sa presyo sa lana mao ang padayon nga pagsulbong sa imbentaryo sa lana sa Estados Unidos. Nga sa labing uwahing ihap niabot na og 447 milyones ka baril, ang kinadaghanan sukad niadtong Disyembre sa niaging tuig.
* * *
Nipasidaan hinuon ang mga eksperto nga mahimong mosaka og balik ang presyo sa lana sa di pa matapos ang 2018. Kini tungod sa pagduso sa Saudi Arabia nga laslasan sa Organization of Petroleum Exporting Countries (OPEC) ang produksiyon sa lana atol sa ilang tigom sa Vienna karong Disyembre 6.
Bisan gitugotan ni Trump nga makapalit og lana gikan sa Iran ang China ug laing pito ka nasud sa mosunod nga unom ka buwan, masaligon ang OPEC nga di matapakan ang haw-ang sa mas ubos nga produksiyon sa lana sa Iran.
- Latest
