Legal nang habal-habal?

Nag-una ba lang si kanhi Kongresista Red Durano sa panahon? Wa ba lay laing nakakita lima ka tuig ang nilabay sa panginahanglan sa habal-habal dihang iyang gipasaka ang balaudnon pagtugyan sa gahom paghatag og prangkisa sa mga motorsiklo nga mamasahero ngadto sa local government units (LGUs)?

Wa kalusot ang balaudnon ni Durano kay mayoriya sa iyang kaubanang mga magbabalaod nakumbinser sa mga pasidaan nga ang habal-habal dakong risgo di lang ngadto sa mga drayber ug mga pasahero kon dili hasta na sa ubang mga motorista nga ikasugat nila sa kadalanan, labi na sa nasudnong highways. Napupos na lang ang termino ni Durano (napili na siyang bise mayor sa Danao City) wa kairog ang balaudnon.

* * *

Apan tungod ba kaha sa grabeng kahuot sa trapiko sa Metro Manila ug ubang dagkong dakbayan sa Asya nga iya nang nasudlan, higanteng kompaniya sa transportasyon ang nipunit sa gisugdan ni Durano. Ang GrabTaxi nagsugod na sa pagpakatap og mga habal-habal, nga iyang gitawag og GrabBike, sa Metro Manila ug sa Bangkok, Thailand nga gikaintapan sa baradong trapiko.

Wa kong kahibawo nananghid ba ang GrabTaxi sa Land Transportation Franchising and Regulatory Board ug sa Land Transportation Office. Apan nakaseguro kong gilaktawan nila ang ruta nga gisubay ni Durano sa pormal nga pag-awhag sa Kongreso pag-usab sa mga balaod pag-legalisar sa operasyon sa mga habal-habal.

* * *

Gilusad na sa GrabTaxi ang lapad nga kampanya pagkumbinser sa mga tag-iya og motorsiklo sa pagparehistro sa GrabBike. Gisaaran ang matag usa og kita nga labing menos P500 matag adlaw, way labot ang uban pang mga insentibo. Gipasaligan sang mga pasahero nga pulos bag-o ang mga motorsiklo ug gihashasan ang mga drayber.

Sa di madugay mokatap na sang GrabBike dinhi sa Sugbo ug ubang bahin sa Pilipinas nga naproblema sa trapiko. Igo lang hinuon silang mosunod sa mga habal-habal nga maoy nakapakumbinser ni Durano pagpasaka sa iyang balaudnon niadtong 2010.

* * *

Ang orihinal nga katuyoan ni Durano mao ang pag-legalisar sa mga habal-habal sa hilit nga mga dapit sa Sugbo ug Kabisay-an ug Mindanao. Kansang mga molupyo hingpit nga nagsalig sa mga habal-habal, bisan sa tokar-tokar nga pagpanakop sa mga operatiba sa LTO, LTFRB, LGUs ug kapolisan, kay di man sila maabot sa naandan nga mga sakyanang pamasahero.

Sa pikas nga bahin, ang GrabTaxi ug ubang mga negosyante, nga mahimong naglumba na sa pagtigom sa ilang kaugalingong panon sa mga motorsiklo nga mamasahero, nakakita og mas dakong kita sa kinapusoran sa labing dagkong mga dakbayan. Kansang apiki nga kadalanan ug nagyagaw nga sistema sa trapiko nakapaungot sa publiko ug pribadong mga sakyanan. Apan mahimo rang lusut-lusotan sa mas nipis nga mga motorsiklo nga duha ray ligid.