Mas andam na sa huwaw
Mas andam na karon ang Metro Cebu Water District kon simbako motidlom na sab pag-ayo ang suplay sa tubig tungod sa nagpadayong El Niño. Labi na kon matinuod ang pasidaan sa Philippine Atmospheric, Geophysical and Astronomical Services Administration nga mas mograbe pang kainit ug kakuwang sa uwan karong Enero sa bag-ong tuig.
Nipasalig si Engr. Noel Dalena, ang bag-ong general manager sa MCWD, nga ang ilang kasinatian sa kalit nga pagtibugsok sa Jaclupan Dam ug ubang mga tinubdan niadtong Marso ning tuiga nakatudlo nila og mahinungdanon uyamot nga mga leksiyon. Usa na ang panginahanglan sa pagtug-an sa mga konsumidor sa tinuorayng kahimtang sa suplay sa tubig.
***
Nga alang nako usa sa dakong sayop sa gipulihan niyang liderato sa MCWD. Ang kanhi general manager nagdumili sa pagpahibawo sa katawhan nga nidangop na sila sa pag-rasyon tubig--pasabot nga may kabalayan na sa Metro Cebu nga pila na lang ka oras ang agas sa gripo matag adlaw, may mga konsumidor man ganing way tubig sud sa pila ka adlaw--tungod sa kabalaka nga mamantsahan ang iyang pamunoan.
Ambot diin manukad ang kabalaka. Kay di man unta niya binuhatan ang El Niño. Wa man unta siyay mahimo pagpugong sa kinaiyahan ug sa huwaw. Nagduda kong nabutaan siya sa wa matarung pagpahimutang nga garbo.
***
Matod ni Dalena wa pa mahitabo ang grabeng kanihit sa tubig nga nahiagoman sa mga konsumidor sa Metro Cebu niadtong Marso, Abril ug Mayo karong tuiga. Gilimitahan na sab nilang daan ang pagkuha og tubig gikan sa Jaclupan ug ubang mga tinubdan aron nga may mahibilin pang reserba kon molahutay gyong El Niño hangtod sa Mayo sunod tuig.
Tungod sa nag-usab-usab nga banabana sa PAGASA, nga ang El Niño magsugod sa niaging tuig pa unta, dayon sa nagkalainlaing buwan na sab karong tuiga ug karon sa Enero hangtod sa Mayo na sab sunod tuig, nanghinaot ang kadagkoan sa MCWD nga di na lang gyod mahinayon ang gikahadlokan nga labing bangis nga huwaw sa kasaysayan.
***
Nagkauyon silang Dalena ug MCWD Public Information Officer Charmaine Rodriguez-Kara nga di nila tagoan gikan sa publiko, hinunoa hingpit nilang ipasabot sa mga konsumidor, kon gikinahanglan na gyod ang pag-rasyon sa tubig.
Masaligon hinuon si Dalena nga mas takos nang ilang sistema sa pagpasimang sa suplay sa tubig ngadto sa labing problemadong bahin sa Metro Cebu, sama sa bukiran ug tungasong mga barangay nga maoy unang ma-ughan, aron pag-iban sa sakripisyo sa mga konsumidor. Matod niya nga human sa unang quarter sa sunod tuig automated na ang valving system sa MCWD. Di sama karon nga manu-mano ang pag-abli ug pagtak-op sa mga barbola ug abtan og duha ka semana una mabatyagan ang epekto.
- Latest
