Drugas sa politika

Mapagarbuhong gipahibawo ni Barangay Kapitan Elmer Abella sa Duljo-Fatima sa usa ka press conference unom ka buwan ang nilabay ang pagbiya nang Jeffrey "Jaguar" Diaz sa negosyo sa ilegal nga drugas. Gikutlo ni Abella si Jaguar nga nagkanayon: "Wa man gyud tay kapaingnan ani, Kap, kon di ta mapriso, mamatay ta."

Apan sukwahi ang kasayuran nga nakuha sa kapolisan. Nahibaw-an nila nga nagpadayon ang ilegal nga kalihokan ni Jaguar. Gani, gilusad sa intelligence operatives sa Cebu City Police Office  ang mas dakong operasyon niadtong Dominggo sa buntag sa samang compound nga gisung sa Criminal Investigation and Detection Group 7 niadtong Oktubre 2003.

* * *

Wa hinuoy bisan usang nadakpan sa target sa 12 ka search warrants sa korte nga silang Jaguar, iyang amahang si Rudy, mga igsuong Noel ug Amelia, mga ig-agawng Reynaldo, Rodel ug Rodrigo, magtiayong Scarlett ug Harvey Pagusara ug Sonny Cisneros. Gisusi na karon sa kapolisan kinsay nipasibat nilang Jaguar lima ka adlaw sa wa pang operasyon.

Duha ang gitumbok nga posibleng tinubdan sa kasayuran nga nakapalingkawas nilang Jaguar ug kaubanan: Mga polis nga mahimong supak sa buot nga nilusad sa operasyon tungod sa pamugos ni Police Regional Office 7 Director Prudencio Tom Banas ug mga kawani sa korte nga mas unang nahibawo sa pagluwat sa warrant.

* * *

Wa kalingkawas silang Kapitan Abella ug ubang mga opisyal sa Duljo-Fatima sa pasangil sa pakigkonsabo ni Jaguar. Apan makalusot si Abella kay niya pa igo ra man siyang gipatawag og tigom sa pundok ni Jaguar. Mga abogado ni Abella, apil nang iyang ig-agaw nga si Cebu City Councilor Gerry Carillo, mosulti hinuon nimo nga ang pahibawo ni Jaguar nga mobiya na di ebidensiya nga nahilambigit gyod sa ilegal nga drugas.

Bisan ang kapolisan niangkon nga wa pa silay bag-ong mga ebidensiya niadtong Marso, atol sa pakigtagbo nilang Abella, nga mga durugista silang Jaguar ug kaubanan. Ug ang kumpisal ni Jaguar kang Abella maisip nga hearsay.

* * *

Sa iyang bahin, gitataw ni Cebu City Mayor Mike Rama atubangan sa sibaw nga mga huhungihong nga wa siyay direktang kalambigitan ni Jaguar, nga iyang giingong wa sab mosuway pagtanyag og tabang sa iyang kampanya. Apan niangkon si Rama nga wa siya magmata og buntag ug busa lisod tuohan nga wa mahilambigit si Jaguar sa politika.

Nasentensiyahan si Jaguar og priso tibuok kinabuhi niadtong 2008. Apan nakagawas sa Muntinlupa human gibasura sa Court of Appeals ang mga kaso sa drugas batok niya. Kon tinuod nga may kakonsabo ang pundok si Jaguar sa kapolisan ug sa hukmanan, laktawan kahang mga politiko sa ilang influencia? Nakapait maong kumpisal sa kapolisan nga si Jaguar ikaduha rang labing dakong drug lord sa Central Visayas.

[email protected]