Taming batok Yolanda
Tabunan, Borbon, Cebu ñ Giinugurahan namo dinhi ang school building nga may duha ka classrooms dul-an duha ka tuig human sa makalilisang nga bagyong Yolanda nga niggusbat sa dakong bahin sa amihanang Sugbo. Makapahimus ini ang mga tinun-an sa Tabunan National High School nga apil sa makaluluoy nga mga biktima sa katalagman.
Naabtan ang 53rd Engineering Brigade sa Philippine Army og usa ka tuig ug tulo ka buwan sa paghingpit sa proyekto tungod sa kalayo gikan sa dagkong hardware nga hingpit sa construction materials. Pormal nga gisugdan ang pagtukod sa Hunyo sa niaging tuig. Gikan ni sa hinabang sa Hoya Corporation sa Japan nga gipaagi sa Sagip Kapamilya sa ABS-CBN Lingkod Kapamilya Foundation.
* * *
Dihang nadawat namo ang hinabang gikan sa Hoya Corporation, nga may unom ka pabrika sa Pilipinas ug mga sanga sa 20 ka nasud sa kalibotan, gisuhid dayon nilang Lutis Cimafranca ug kaubanan sa Bantay Bata 163 Cebu ang mga dapit sa amihanang Sugbo nga labing nagkinahanglan og classrooms.
Si Mayor Butch Sepulveda sa Borbon ug ang mga magtutudlo sa Tabunan National High School ang labing unang nakasumiter sa gikinahanglan nga mga dokumento. Kay nagdali man ang Hoya nga masugdan dayon ang proyekto, nakiglambigit dayon mi sa 53rd Engineering Brigade nga kinahanglang mosaling-it sa proyekto sa puno na nilang kalendaryo sa pulos dinaliang Yolanda projects sa Kabisay-an.
* * *
Di tiaw ang mga pagsuway nga nahiagoman sa kasundalohan nga nagtukod sa school building dinhi. Gawas sa nagpulipuli nga grabeng kainit sa El NiÒo ug sa kusog nga mga bundak sa uwan nga hinungaw sa mga bagyo, kinahanglan silang makigtigi sa lapad nga panginahanglan sa construction materials sa ubang mga dapit sa amihanang Sugbo ug silangang Kabisay-an nga naigo sa Yolanda ug sa construction boom sa Metro Cebu.
Ug namunga na gyod ang ilang kahago ug pailob. Makabalhin nang mga tinun-an gikan sa naghuot nilang karaang classrooms. Matuman nang pangindahay sa mga ginikanan nga magpadayon ang edukasyon sa ilang mga anak bisan human sila nahagsa sa bagyo.
* * *
Ang pormal nga pagtunol sa school building ngadto sa Departamento sa Edukasyon (DepEd) ug sa Munisipyo sa Borbon gipangulohan nilang Akiko Chiba sa Hoya Corporation, Lt. Gen. Nicanor Vivar sa Central Command, Sagip Kapamilya Deputy Director Marcel Rinon ug ABS-CBN Visayas Cluster Head Tata Cinco-Sy.
Mapagarbuhon ming motaho nimo ang school building nga among giinugurahan makasugakod sa mga bagyo bisan sama kakusog sa Yolanda. Usa ni sa labing unang nisagop sa mas lig-ong desinyo sa DepEd ug sa ABS-CBN Lingkod Kapamilya Foundation human sa Yolanda niadtong Nobyembre 2013. Mas mahal kay sa naandan apan mas malinawong makatug ang mga tinun-an, mga magtutudlo ug mga ginikanan nga may kasaligan na silang panagang sa umaabot nga mga katalagman.
- Latest
