Kusi sa tanlag
Angay’ng moangkon og responsibilidad si Presidente Noynoy Aquino sa trahedya sa Mamasapano, Maguindanao. Taphaw ang pasalig nga iyang bawnon hangtod sa kataposan niyang mga adlaw ang pagkamatay sa 44 ka sakop sa Special Action Force kay sa samang higayon nanghunaw siya og bisan unsang responsibilidad sa paglusad sa operasyon.
Panahon nang angkunon ni Aquino ang responsibilidad kay napakyas ang nahaunang mga pagsuway pagpalayo sa iyang kaugalingon gikan sa trahedya. Di siya makaikyas og responsibilidad ug pagpasa ini ngadto sa uban sa way paglubag sa tinuod nga mga panghitabo.
***
Dihang girelibohan dayon ni Aquino ang pangu sa SAF, Director Getulio Napeñas Jr., ug way pupanagana nga gihan-okan sa tanang pagbasol kay wa motuman sa iyang mga sugo, naklaro na kinsay napilian nila nga pa-um-oman sa bulilyaso. Bisan nihimakak si Napeñas sa mga pasangil sa kasaypanan niangkon siya og hingpit nga responsibilidad sa pagpadayon sa operasyon ug sa wa pagpahibawo sa militar tungod sa kabalaka nga mohungaw ang kasayuran.
Apan human sa pila ka adlaw, nitumaw ang dugang kasayuran nga nagbutyag nga wa magbuut-buot si Napeñas paglusad sa operasyon. Nabantang sab nga igo lang siya nga nagtuman og sugo sa paglaktaw nilang DILG Secretary Mar Roxas, PNP Deputy Director General Leonardo Espina ug AFP Chief Gregorio Catapang.
***
Human sa tulo ka adlaw nga sunudsunod nga imbestigasyon sa Senado ug House of Representatives, ug salamat sa kaisog sa pangasaba ni Senador Miriam Defensor Santiago, niangkon na gyud si Direktor Heneral Alan Purisima og responsibilidad sa trahedya. Gibakwi nang iyang pag-insister nga igo lang siyang nitambag ug nihatag og kasayuran apan wa gyoy bisan gamayng papel paglusad sa operasyon.
Apan suspendido si Purisima sa iyang pagpanginlabot sa operasyon. Way laing makatugot niya pagpadayon pagduma sa Operation Exodus gawas ni Presidente Aquino. Ang talagsaong kasuod nilang Aquino ug Purisima mahimong maoy nakapakumbinser nilang Napeñas ug kaubanan pagtuo nga ang bisan unsang sugo ni Purisima gikan ni Aquino.
***
Wa katabang sa pagtago ni Aquino ang pagdumili ni Purisima pagtubag sa bisan unsang pangutana mahitungod sa ilang gipanagsultihan kay kinahanglan pang mananghid sa commander in chief. Ang pagpasalipod sa executive privilege mas makapaisog lang sa mga kaatbang sa presidente.
Ang pagtug-an sa kamatuoran ug pag-angkon og responsibilidad di makapahuyang sa iyang pamunoan: Lehitimo ang operasyon, nakuha ang usa sa labing gikaintapang terorista sa Asya, wa makawang ang kamatayon sa SAF commandos ug maibanan untang kadaot kun gituman pang iyang mga tugon. Human sa pagkapukan ni alyas Marwan, way makapasangil ni Aquino og kalubay sa mga terorista. Bisan sa pagduda sa kamatinud-anon sa pipila ka mga sakop sa MILF, sila gihapon ang labing dakong paglaom alang sa mas malungtarong kalinaw sa Mindanao.
- Latest
