Presyo sa tubig gipausbawan

Pausbawan na sa Metro Cebu Water District  ang presyo sa tubig nga ilang ibaligya sa mga konsumidor sugod karong Enero 1.

Sa laktud, ang MCWD mopatuman lang og usbaw nga P1.60 sa matag cubic meter nga tubig nga magamit sa mga pamilya nga ang konsumo nga tubig dili makaabot og 50 ka baril sa usa ka buwan.

Karon, P136.60 lang ang minimum nga bayranan sa MCWD apan unya sa Enero mahimo na kini nga P152. Unya kadto'ng mokonsumo og 51 ngadto sa 100 ka baril sa usa ka buwan, ang bayranan 'tag P16.80 na ang matag cubic meter.

Ang usa ka cubic meter nga tubig katumbas kini sa lima ka baril kon 1,000 ka litros. Kadto'ng mokonsumo og 21 ngadto sa 30 cubic meters nga tubig, ang ilang bayranan 'tag P19.77 na ang matag cubic meter.

Ang mokonsumo og tubig nga lapas sa 31 cubic meters ang ilang bayranan 'tag P48.40 na ang matag lima ka baril. Nakasabot ko sa tumong sa MCWD nga igo lang sila nga mamawi sa ilang gastos.

Sukad gud niadto'ng 2005, ang MCWD wala na gayud mopatuman og usbaw sa ilang bayranan sa tubig. Para nako, dili man g'yud dako ang mao nga usbaw.

Kami gani sa bukid, nagbayad man og 'tag P75 ang matag cubic meter gikan sa mga tawo nga nagnegosyo sa ilang tubig. Kay maisip man nga commercial rate ang ilang gibayran sa MCWD, sa ato pa P48.40 ra ang kada cubic meter.    

Kun kuwentahon, dako g'yud kaayo sila'g ganansya uy. Suwerte ang mga nagpuyo sa Upper Fatima, Barangay Apas kay gipatauran na sa MCWD og koneksyon sa tubig paingon sa among lugar.

***

Nakabasa ko og giingong popularity survey sa mga tawo nga gituohang molansar pagka presidente sa eleksyon karong 2016. Naapil sila si Senador Miriam Santiago, Vice President Jejomar Binay, DILG Secretary Mar Roxas ug uban pa.

Labaw na si Roxas og mga puntos kay kang Binay. Kun tinuod man gani ang mao'ng resulta sa survey, nagpasabot nga naapektahan g'yud diay si Binay sa mga pasangil nga gihimo ni kanhi Makati City Vice Mayor Ernesto Mercado?

Daan pa lagi ko nga kun si Binay padayon lang nga magpakahilom ug dili gayud tubagon, punto por punto, ang mga pasangil batok kaniya, mous-os ang iyang pagka popular ug ang katawhan dili na ganahan kaniya.

Awhag nako'ng Binay nga dili mahadlok ug atubangon ang mga pasangil. Kun magpadayon siya nga magpadiki-diki sa pag-atubang sa imbestigasyon ug bisan sa media siya molikay, motuo na g'yud ang katawhan nga siya sad-an.

Busa, mentras may higayon pa, atubanga ang imbestigasyon Mr. Vice President ug depensahe ang imong kaugalingon. Ang akong gikulbaan kay si Merkado mihabad ra ba g'yud nga daghan pa nga anomaliya nga giingong naglambigit sa bise presidente nga iyang ibulgar.

***

Nalipay ko kay ang kadagkoan sa CITOM mihimo gayud og lakang aron pagsulbad sa problema sa trapiko matag buntag diha sa Gorordo Avenue dapit sa eskena Sudlon nga sakop sa Barangay Lahug.

Bisan og unsa na lang intawon ang ilang gihimo. Diha'y higayon nga daghang traffic enforcers ug mga polis nga ilang gidistino aron pagbadlong sa mga drayber nga dili motuman sa lagda.

Dayon, gipangbutangan og mga "No U-Turn" signs ang taliwala sa karsada, apan dili mabang-bang. Lain nila nga paagi nga wala na'y itugot nga left turn sa eskena Gorordo ug Sudlon.

Ang resulta, adto ra sa unahan mohimo og U-turn ang mga drayber ug dili lang pangdakpon sa mga traffic enforcers nga tua ra magbarug sa layo.

Para nako, mahimo man nga itugot ra ang left turns diha sa eskena Gorordo ug Sudlon, apan kinahanglan nga adunay traffic enforcers nga magdumala.

Dili kay magtago-tago. Kagahapon sa alas 10:30 sa buntag, ang usa ka traffic enforcer didto ra sa layo naglantaw sa eskena. Ngano nga dili man siya anha magbarog sa eskena g'yud?