Nganong mahadlok man?

Nganong mahadlok man ang mga drayber ug ang mga tag-iya og sakyanan kun pausbawan ang mga multahan sa mga madakpan tungod sa paglapas sa lagda sa tukma'ng pagmaneho?

Nagpasabot ba kini nga mohimo g'yud sila og kalapasan ug nanagana sila'ng daan nga basin kun sila madakpan dili sila makabayad og dako nga multa?

Gibasa nako pag-ayo ang "schedules of fines" sa mga madakpan sa kalapasan sa Transportation and Traffic Code base sa bag-ong gipagawas nga Joint Administrative Order 2014-01. Daghan g'yud tinuod sa multahan nga ang kantidad misaka pag-ayo.

Nakaingon ko nga nahadlok gayud ang mga drayber nga mireklamo pinaagi sa pagpahigayon sa protesta, apan ang mao nga Joint Administrative Order, aduna usa'y bentaha ngadto sa mga sumasakay.

Kaniadto, ang mga drayber nga mamili og pasahero nga ilang pasakyon, multahan og P1,500 sa una nga higayon og suspensohon ang iyang lisensya bali'g usa ka buwan.

Apan karon sa bag-ong kamandoan, ang multa sa drayber ug public utility vehicles nga mamili og pasakyon? Gamay ra, P5 mil sa una'ng higayon, P10 mil sa ika-duha, ug P15 mil ug kanselahon ang prangkisa sa sakyanan.

Unya, nasayod na man kita nga daghang drayber o konduktor mokolekta og subra? Pananglit P7.50 ra ang pletehan unya kolektahan ta og P8, aw P5 mil gihapon, P10 mil ug P15 mil.

Kini'ng mga abusado nga tag-iya og sakyanan nga tuyoon gayud nila pagtaptap og itom nga bildo ang ilang plate numbers aron dili makita - P5 mil ang multa ana. Siyaro og dili maleksyon.

Singko mil pesos gihapon ang multa sa mga drayber nga masakpan nga ang walay suga, o kaha depektoso ang ilang suga, walay mga side mirrors ug uban pa nga accessories. Unya dili ba kita malipay niini?

Apan mas grabe kadako ang multa sa mga masakpan nga magmaneho og sakyanan nga wala marehestro, expire o kaha inbalido nga rehestro kay P10 mil. Kaniadto, P4 mil ra man ang multa.

Ngano'ng dili man 'usab iparehestro ang mga sakyanan? Kun walay rehestro, walay insurance. Kun makadam-ag mo'g tawo, makabayad kaha mo nga wala man kamo'y insurance?

Kun magbinuotan lang g'yud ang mga drayber, dili mahadlok niini'ng mao nga kamandoan sa DOTC.

Luoy man gud kun maaksidente ang sakyanan nga walay prangkisa kay dili gayud kini bayaran sa insurance panahon nga adunay mamatay ug maangol.

Hala, mas labing maayo nga ang kadagkoan sa LTO nga paspasan ang paghimo'g kampanya batok sa mga badlongon nga drayber.

* * *

Husto bitaw ang gitambag sa Commission on Audit  nga bisan kadtong mga nangawkaw nga opisyal ug kawani sa City Hall kaniadto nga nakonbikto na sa kaso sa hukmanan, himoan gihapon nila og paagi aron makolekta pagbalik ang kinawat nila nga salapi.

Aduna may balaod niana nga kadto'ng mga kurakot nga kawani sa kagamhanan sakmiton ang iyang mga butang. Unya, siyaro na man usab og hangtod karon wala gayud makakuha og inpormasyon ang kapolisan kun hain na kadto si Rosalina Badana?

Kapin sa P18 milyones ang nakawkaw kaniadto ni Badana, kanhi pay master sa City Hall, nga gipasagdan lang og nakatigum og dako nga kantidad kay ang City Treasurer's Office wala man magtagad pagkuha sa subra sa kuwarta nga gitugyan kaniya.

Mano-mano man gud ang sweldo kaniadto sa mga kawani sa City Hall kaniadto mao nga ang mga pagador kon pay master hatagan og tag pila ka milyon ka pesos aron ipanuweldo.

Dili man untop ang ihatag kanila nga kantidad mao nga kanunay'ng masubrahan. Kay wala man kuhaa og balik sa City Treasurer's Office, si Badana nakatigum og kapin sa P18 milyones.

Diha nga nabantayan na sa COA, milayas si Badana ug wala na gayud mahibaw-i. Siyaro ug wala gayo'y nakatug-an kun hain na karon si Badana?

Angay kadto nga tanggongon sa bilanggoan ipon sa mga uk-ok, ilaga ug lamok kun madakpan.