Baha, klase ug DYAB
Nipasidaan ang (Philippine Atmospheric, Geophysical and Astronomical Services Administration) nga mahimong magsugod na ang ting-uwan karong semanaha, kanus-a giablihan nang klase sa mga eskuylahang publiko, o labing dugay sunod semana, kanus-a mangabli nang klase sa pribadong mga eskuylahan. Gilihian dayon og baha ang unang adlaw sa klase sa Alaska Elementary School sa Mambaling, Dakbayan sa Sugbo.
Gipasaligan hinuon ang mga magtutudlo sa mga opisyal sa barangay nga unahon pag-atiman ang mga kanal palibot sa eskuylahan aron nga di mahasol sa dugang baha ang mga bata. Malaumon sab si Regional Director Carmelita Dulangon sa Department of Education sa Central Visayas nga maatiman ang drainage system sa ubang eskuylahan sa Sugbo, Bohol, Siquijor ug Negros Oriental.
* * *
Gawas sa eskuylahan sa Alaska, masulub-on nga niangkon si Cebu City Engineer Jose Marie Poblete nga nahulga sab sa baha ang hapit tanang eskuylahan sa dakbayan. Matod niya ang bugtong nakalingkawas mao ang mga eskuylahan nga nahimutang sa ibabaw nga mga luna sa bukirang mga barangay.
Ang maayong balita, segun ni Cebu City Councilor Gerry Carillo, mao nga P400 milyones ang gigahin sa Cebu City Council karong tuiga alang sa pagpalambo sa drainage system. Ang daotang balita, segun ni Poblete, mao nga ang P300 milyones giwaling sa pagtukod sa bag-ong Cebu City Medical Center.
* * *
Di mohatag og dugang detalye si Poblete apan iyang gipahibawo nga may giandam silang bag-o ug lahi nga sulbad sa way kinutoban nga baha sa downtown area sa dakbayan. Matod niya wa masulbad ang baha sa Colon ug kasilinganang kadalanan bisan sa pagpadako ug paglimpiyo sa mga imburnal. Maong hatagan niya og higayon ang bag-ong mga sulbad.
Nipasalig si Poblete nga kapuslan gihapon nila ang nahibiling P100 milyones nga gahin. Bisan wa ra sa kumingking kon itandi sa hagbay rang girekomendar nga komprehensibong drainage system. Labi na kay nikumpisal sab si Association of Barangay Captains Cebu City Federation President Phillip Zafra nga way igong pundo ang mga barangay pagpalapad sa ilang mga kanal.
* * *
Nagkaabot silang Zafra, Poblete, Carillo ug Dulangon sa panel discussion paglusad sa bag-ong mga programa sa DYAB Abante Pa, Bisaya! Nitambong sab silang Atty. Dante Jadman sa Commission on Human Rights, Atty. Edwin Antipuesto sa Land Transportation Franchising and Regulatory Board ug Atty. Collin Russell sa Division for the Welfare of the Urban Poor.
Magsaulog ang DYAB sa tibuok buwan sa Hunyo sa iyang ika-19 nga anibersaryo. Labing dagkong kahulogan naglakip sa Kapamilya Run sa Ayala Terraces karong Hunyo 15 ug Grand Halad sa Kapamilya sa Cebu Technological University Main Campus karong Hunyo 28. Tema sa kasaulogan: "Pag-unong sa Katawhan Pagbarug nga Mas Kusgan."
* * *
Email: [email protected]
- Latest
