Dagan batok sa katalagman

Samtang nagbunok ang uwan nga gihuwad sa bagyong 'Zoraida' ug padayong nisibaw ang mga yangungo sa mga paryente nga wa pa maabti og hinabang ang mga biktima sa super typhoon 'Yolanda' sa amihanang Sugbo ug silangang Kabisay-an, gipahinumdoman ang tanang hingtungdan, kon simbako nakalimot na sila, nga nagpadayon pa ang kusog nga mga pagtay-og human sa makalilisang nga linog sa Bohol.

Mas unang nakabantay ang United States Geological Survey sa magnitude 4.8 nga linog nga nitay-og sa Bohol ug Sugbo sa ala-1:21 gahapon sa hapon. Nauwahi og dul-an sa oras ang Philippine Institute of Volcanology and Seismology. Ang USGS sab ang nakatultol sa epicenter sa linog sa lunsod sa San Isidro sa Bohol. Sama sa naandan, Tagbilaran City ra ang nailhan sa Phivolcs.

***

Apan ambot naanad na ba lang sa nangaging mas kusog nga mga pagtay-og, o mas tukma ang nasukod sa Phivolcs nga mas hinay nga magnitude 4.5, o gituyo lang sa kahigayonan kay di ganahang mabalda gikan sa mas mahinungdanon ug mas dinalian nilang gimbuhaton, wa kabantay sa linog ang gatosan ka mga boluntaryo nga nagtinabangay pag-repack ug paghakot sa nagbaha nga mga hinabang sa mga Sugbuanon alang sa mga biktima sa bagyo.

Kami ray nakabantay sa linog kay naatlan nga nagtigom sa ikaduhang andana sa ABS-CBN Broadcast Complex. Mas naikog ang among kaubanan nga matarantar kay way kasayuran ang mas batan-ong mga boluntaryo unsay nakapahugyaw namo.

***

Nahukman namo atol sa tigom ang pagpahigayon sa Kapamilya Run alang sa mga biktima sa bagyong Yolanda karong Dominggo, Nobyembre. Ang lima ka kilometro nga fun run sugdan ug tapuson sa dakong wanang sa Cebu International Convention Center sa Dakbayan sa Mandaue.

Tanang matigom gikan sa P300 ang registration fee ipamalit og dugang pagkaon ug tubig ug ubang mga panginahanglan sa mga biktima sa bagyo. Aron pagtigom og mas dakong pundo way singlets nga ipanghatag ug way ideklarar nga mga mananaog.

***

Nakabuylo nang rehistrasyon sa Kapamilya Run alang sa mga biktima sa bagyong Yolanda sa ABS-CBN Broadcast Complex sa Mandaue City ug sa Fuente Osmeña sa uptown area, Cebu City. Tapuson ang rehistrasyon sa alas-6 sa gabii karong Sabado, Nobyembre 16. Magsugod ang lumba sa alas-5 sa buntag sa Dominggo, Nobyembre 17.

Gipanghinaot namo nga ang pagdagan, sama sa talagsaong pasundayag sa kamanggihatagon ug kamatinabangon sa mga Sugbuanon nga nisanong sa nagpadayon nga Kapamilya Relief Campaign, makakumbinser sa tanang hingtungdan, kon simbako nataligam-an na nila, nga way bunok sa uwan, ni mangtas nga bagyo, ni makahahadlok nga linog, ang makapawong sa paningkamot sa katawhan pagbangon gikan sa pagkapukan sa katalagman, pagbarug pagbalik sa ilang mga tiil ug paghimo og bag-ong lab-as nga sinugdanan.

***

Email: [email protected].