Palpak sa Sinulog

Gubot pa's lukot. Mao kini ang paghulagway nako sa pagpahigayon sa Sinulog Grand Parade kaniadtong Dominggo.

Daghang mga salawayon nga buhat nga wala g'yud maaksyoni, bisan pa man sa pagpasiatab ni Mayor Michael Rama nga duna siya'y “Shadow Cabinet” nga motabang aron hapsay ang kalihukan.

Sugdon nato sa buntag pa. Daghang mga tawo nga misayo pag-adto sa carousel route aron makapahimutang silang daan sa gihimo nga mga bleachers sa Cebu Contractors Association, apan nabawo lang.

Ang mga contractor gihangyo sa City Hall nga magbutang sila og bleachers daplin sa karsada alang sa publiko. Gani duna pay streamers nga gibitay nga “This bleacher is for public use.”

Apan ang mga kadaghanan sa mga contractor nga nagtukod og bleachers nagbutang og tawo nga mobantay nga magamit lang kini alang sa ilang bisita.

Usa niini ang PLD Construction. Ang nagbantay miingon nga gimandoan sila ni Engr. Paul Dy, ang tag-iya sa construction company, nga ang ilang ra'ng mga bisita ang pasak-on.

Si Jovy Morelos, usa sa mga department sa City Hall ug maoy gitahasan pagsuperbisar sa mga bleachers miingon nga ang lagda “First come, first served basis.”

Hinoon, matud pa nga si Paul Dy nangayo og mga 20 percent alang sa ilang mga bisita apan nganong dili man g'yud pasak-an sa publiko. Bakak ni kay miudto na lang bakante pa ang maong mga bleachers.

Kon ingon man gani niini ang himoon sa mga kontraktor, maayo pa ug wala na lay bleachers kay ang maong luna makagamit pa sa mga tawo aron adto sila magtindog.

Dunay laing bleachers duol sa eskena Maxilom ug Elizabeth Pond gibutangan g'yud gani og gwardya nga unipormado. Kadto ra nga mga bisita sa “Ongtiak management” maoy makasaka.

Gitawag nako ug giteksan sa makadaghan nga higayon si Mayor Michael Rama, walay tubag. Udto na nga si Rama mitubag sa text message nga kuno “Noted.”

Dayon, nakit-an nako si Rama nga nag-angkas sa motor nga gisunod sa mga siyam ka laing motorsiklo, ang uban iyang mga bodyguard, apan ang uban 'sab miapil nga para lang “gara-gara.” Resulta, nakadam-ag og sakop sa Cotabato contingent.

Nganong wala man dayon tul-ira ni Mayor Rama ang hiwi nga gihimo sa pipila ka kontraktor? Hain na man ang mga sakop sa “Shadow Cabinet” sa mayor?

Ang crowd control pwerteng palpaka sa ilang trabaho. Didto sa General Maxilom Avenue, ilabi na sa Fuente Osmeña, gubot pa lagi's lukot. Dunay DJ nga nagpatugtog og kusog kaayo nga music daplin sa karsada atubangan sa gasoline station eskina Maxilom ug Juana Osmeña Streets ingon man sa atbang sa Mango Square.

Ang kusog kaayo nga mga tugtog daplin sa karsada makatugaw sa pagsayaw sa mga contingents. Wala ba kamo masayod nga ang mga Sinulog dancers magbasi sa ilang sayaw sa tugtog gikan sa mga sakop sa ilang Drum and Buggle Corps?

Nganong wala ma'y nakaalinggat niadto sa mga opisyal sa City Hall ug mga sinaligan sa mayor? Bisan ang mayor nga nagsakay og motor ug pagkahapon naglakaw didto sa Maxilom wala makabantay?

Apan ang grabe g'yud kaayo nga kaguliyang nahitabo pagkahuman na sa parada. Basta kay ang mga tawo hapit dili na makalihok ug nabara g'yud ang mga sakyanan sa eskena Maxilom ug Juana Osmeña.

Napugos ko sa paglihok aron makaatras kadtong awto nga usa sa nakapabara sa maong dapit. Nganong gipasulod na man ang mga sakyanan didto nga daghan pa kaayong mga tawo sa karsada? Kinsay angay nga basulon sa maong palpak?