Mas dakong problema ni Garcia

Kon wa gihapoy luwatan nga temporary restraining order (TRO) ang Court of Appeals (CA) atol sa paghusay sa petisyon ni suspendidong Gobernador Gwen Garcia batok sa suspension order nga giluwatan sa Malakanyang batok niya, mokanaog na ba si Garcia sa iyang buhatan sa Kapitolyo?

Di lang makausa, ni makaduha, kon dili sa makadaghang higayon gibalikbalik ni Garcia nga dili pa siya motahan. Kay human sa CA makahimo pa sila pagdangop sa Korte Suprema. Ang labawng hukmanan wa mabantog sa kapaspas paghusay sa mga kontrobersiya. Sa ato pa, way garantiya nga mokanaog si Garcia hangtod nga mapupos ang iyang termino karong Hunyo.

***

Sa pikas nga bahin, sakto ang hukom ni Acting Governor Agnes Magpale pagtugot ni Garcia nga magpabilin sa iyang buhatan hangtod nga ganahan pa siya. Gawas lang kon makahasol siya sa pangalagad sa Kapitolyo ngadto sa Sugbuanong mga magbubuhis.

Nabantang hinuon nga bisan naa ra sa iyang buhatan takos si Garcia nga mohasol sa kinabag-an sa katawhan nga wa manginlabot sa iyang kawsa. Mga alyado ni Garcia nga gipangulohan ni Cebu City Mayor Mike Rama maoy nakigkonsabo ni Garcia sa paghakot sa ilang mga dumadapig, bahala na nga nabara ang trapiko ug nalangay ang lehitimo nga mga panginabuhi ug mga patigayon.

***

Di kahikawan ang mga dumadapig ni Garcia sa ilang katungod sa pagprotesta. Di kalugpitan ang ilang kagawasan sa pagpadayag sa ilang suporta sa kawsa ni Garcia sa way pagpahuyang sa demokrasya. May mga lagda hinuon nga angayng subayon sa pagpabati sa imong tingog.

Samtang may tanang katungod si Garcia sa pagkuwestiyon sa legalidad sa pagsuspeno ni Presidente Noynoy Aquino niya sud sa unom ka buwan, kinahanglan siya nga mosubay sa mga lagda. Sama nga obligado ang Malakanyang pagpabalik niya sa katungdanan kon makakuha si Garcia og TRO, angay sang mokanaog si Garcia kay way TRO nga giluwatan ang CA samtang naghusay sa iyang petisyon.

***

Mas dako hinuon ang problema ni Garcia kon lugwayan pa gyud sa gobyerno ang pailob sa iyang pagpabilin sa Kapitolyo. Human nideklarar nga mapapaha lang sa iyang buhatan kon patay na, gihan-ok ni Garcia ang iyang kaugalingon sa ngitngit nga suok. Mawad-an siya og dagway kon boluntaryo nga mokanaog sa iyang buhatan nga buhi.

Kay wa man gyoy timaan nga moggamit og puwersa ang kapolisan, kasaligang tinubdan nagbutyag nga may exit strategy nang mga Garcia: Ideklarar sa ilang sinulohang mga doktor nga may grabeng sakit si Garcia, busa bisan supak sa kabubut-on kinahanglan nga mokanaog aron moadto sa tambalanan, ug mahimo bang di lang una manubag sa mga pangutana sa nabistong mga transaksiyon sa iyang pamunoan samtang magpahibalik sa iyang kahimsog.

***

Email: [email protected].