Political will

Nganong dili man gayud sakitan ang mga opisyal sa Cebu City Hall nga mausik ra ang kwarta nga gikan sa buhis sa katawhan?

Gitug-anan ko ni Ginang Amelita Sola, ang tag-iya sa yuta nga nahimutang kilid sa karaang Fort San Pedro nga palitonon sa dakbayan sa Sugbo, nga ang mga trabahador sa City Hall walay trabaho ug mangatulog ra gani.

Gihimoan nako kini og ocular inspection usa ka buntag niana ug tuod, naabtan nako ang pipila sa mga trabahor nga gisuweldohan sa Cebu City School Board, nga dunay naghigda, ug ang uban naglingkod nga walay trabaho.

Apan alang kanako, wala sila magtinapolan. Napugos lang sila paghigda-higda, pagyaka lang ug usahay magduwa og baraha sa oras nga tingtrabaho kay wala man sila padad-i og materyales nga ilang matrabaho.

Ang walo ka “job-order workers” maoy gitahasan pagtrabaho sa pagpanday sa balay ni Sola nga ang kabahin niini giguba nila aron sa paghimo’g agianan likod nga bahin sa Fort San Pedro.

Hatagi ninyo og materyales ang maong mga panday aron dili sila magsige lang og katulog. Maayo ra ba og usa lang ka adlaw nga matud pa ni Amelita Sola pwerteng dugaya nga ingon gayud niini ang sitwasyon.

Matulog ug kon momata na, magduwa og baraha. Unsa, wala mo anugni sa kwarta nga mausik lang?  Matag adlaw P2,720 ang mausik kay ang matag usa sa walo ka trabahador gisuweldohan og P340.

Unya, unsa man kining report nga dunay opisyal sa City Hall nga miingon ni Sola nga padawaton lang siya og P1.5 milyon? Awhagon nako si Konsehal Jose Daluz III nga susihon niya ni pag-ayo kay ang imong gipangayo sir, P2,039,500 nga bayad para ni Sola.

Susiha palihog sir kon kinsa ang opisyal nga miawhag ni Sola nga padawaton lang og P1.5 milyon.

Wala mopakita si Mayor Michael Rama sa iyang “political will” aron matangtang ang mga poste nga anaa pa diha nagpabilin sa tunga nga bahin sa Escario Street.

Hain na man kadtong imong gipasalig mayor Mike nga ipa-ibot nimo ang maong mga poste kon ang mga hingtungdan dili mohimo niini lapas sa gihatag nimo nga ultimatum hangtod sa miaging Hulyo 1?

Pastilan, hapit na lang mapupos ang buwan sa Septiyembre apan wala gihapon makuha ang maong mga poste. Bilib ko sa Visayan Electric Company kay gikuha na nila ang ilang mga linya sa poste.

Apan ang poste, bisan iya ni sa Veco, dili pa makuha nila kon anaa pa ang mga alambre nga iya sa ubang public utility companies sama sa mga linya sa telepono ug Cable TV.

“Pating” kaayo’g mga utok ning mga tawhana. Wala ba kamo makatan-aw nga nakahasol sa pag-agi sa mga sakyanan kanang maong mga poste nga anaa na sa taliwala sa karsada?

Imbes magamit ang karsada nga two-way lanes, nagpabilin kini nga “one way” ug ang daplin gigamit ra nga parking area sa mga sakyanan.

Hagit kini sa mayor nga ang mga kawani sa City Hall maoy pakuhaa sa maong mga poste.

Matag higayon nga pahinumdoman nako ang mayor niini, modayon lang siya’g patawag sa iyang staff ug motakda og miting sa iyang mga sakop, apan walay resulta.

Ang CITOM gani mitangtang na man sa ilang traffic lights diha sa maong karsada mao nga kuyaw kaayo kon magbinanggaay ang mga sakyanan dihang eskenaha. Kamong mga sakop sa mayor, lihok na mo uy!

* * *

Maayo unta og tinud-on ni LTO Assistant Regional Director Arnel Tancinco ang pag-inspection sa mga sakyanan diha sa Motor Vehicle Inspection Center (MVIC).

Kon tinud-on ni Arnel ang pag-inspection, puwerteng daghana sa mga PUJ nga dili na makadagan kay mga dunot na ug kuwang pa gayud og kahimanan sama sa suga, hand brakes ug uban pa.

Hapit na lang gud ko napul-an sa pagpanakop niining maong mga PUJ kay mora’g walay pagkahurot. Unsaon, nga ang ubang kawani sa LTO mo-release ra man sa lisensya sa drayber bisan wa gayud ayoha ang depekto. Pait kaayo uy.

Fight g’yud sir Arnel!