Dili ba mahal ra?

Angay’ng tubagon ni Mayor Michael Rama kining isyu nga pagtugot niya nga moabot og sobra sa tunga sa milyon ka pesos ang gigasto sa dakbayan sa Sugbo pagpatambal sa anak sa duha niya ka suod nga opisyal sa City Hall.

Kanunay kini nga gibalik-balik pagsibya sa programa sa radyo nga gidumala sa Bando Osmena Pundok-Kauswagan (BOPK) mao nga gusto karon sa katawhan nga motingog na ang mayor kabahin niining maong isyu.

Dili lang nako ibutyag ang ngalan sa duha ka opisyal sa City Hall nga adunay anak nga ang gastohan sa ospital giabaga sa City Hospitalization Assistance Medical Program (CHAMP).

 Buyno, kon ang duha ka opisyal sa City Hall lumolupyo o botante man sila dinhi sa dakbayan, mahimong makadawat sila og tabang gikan sa CHAMP.

Apan ang isyu nga naglambigit niini mao nga pila man ang kantidad nga angay’ng makuha nila isip benepisyo? Nakadungog ko nga gitugotan ang usa ka lumolupyo nga makapahimulos og P25,000.

Ako gani nga nagkinahanglan og maintenance nga tambal, wala gayud mangayo sa City Hall kay makaingon unya sila nga nagpahimulos ko sa higayon kay abi anaa ra ba ako madestino isip reporter sa City Hall.

Kini maoy tubagon ni Mayor Rama. Mahimo ra ba diay nga moabot og sobra sa P100,000 ngadto na sa P400,000 ang ma-charge sa usa ka beneficiary ngadto sa CHAMP?

Duna ko’y mga higala nga opisyal sa City Hall nga akong gipangutana niining maong isyu, apan tak-um ang ilang ba-ba niini. Sa pagsuwat nako niining maong lindog, ang mayor wala pa motubag kanako kabahin sa isyu.

* * *

Karong buntag, magtigum ang Bids and Awards Committee (BAC) ug apil sa ilang hisgutan kon tukma ba nga ang feeding program alang sa 8,000 ka tinun-an sa Day Care Centers dinhi sa dakbayan, adto i-award sa Aikalami Foods Corporation.

Nahimo nga kontrobersyal kining maong feeding program sa dakbayan tungod kay daghan ang nagtoo nga alkanse ang kagamhanan niining maong proyekto kay mahal kaayo ang kantidad sa pamaliton nga pagkaon.

Nindot ang tumong sa feeding program kay gitumong kini aron mominus ang mga bata nga malnourish diha sa atong elementarya. Dili man gud kalikayan nga dunay mga bata nga kuwang tawon og pagkaon.

Apan daghan ang mihulagway sa kantidad sa mga palitonon basi sa purchase request nga gipreparar sa Cebu City Nutrition Council nga mahal ra kaayo. Ang karne nga baboy tag P240 ang kilo, ang “large size” nga itlog tag P8. Gawas niini may mga utanon nga mahal ‘sab.

Misuway ko pagsulod sa department stores. Uy, ang pulos unod gani nga karneng baboy tag P180 ra man ang kilo. Unya ang itlog wala gani nagpresyo og P7 ang buok.

Mikontak usab ko sa mga ilado nga poultry farms sa lainlaing dapit sa Metro Cebu sama sa Consolacion, Mandaue ug Minglanilla ug akong nahibaw-an nga nihit diay kaayo ang large size nga itlog.

Gikuyawan ko nga large size ang gibutang sa purchase request unya ang ma-deliver gagmay kay nihit lagi kaayo ang dagko nga itlog. Ang large size nga itlog motimbang og dili mominus sa 64 grams.

Dunay uban nga miingon nga gidaginot pa gayud nako ang itlog. Wala man gud sila masayod nga ang buot nga paliton nga itlog 367,000 ka buok nga kon tag P8 ang usa, mokantidad ang tanan og P2,940,000.

Ang karneng baboy usab nga buot paliton bali’g P2.7 milyones, wala pay labot sa mga gulay. Napulo ka milyon ka pesos kining maong budget ug ang Aikalami Foods maoy lowest bidder.

Karong buntag, magtigum ang mga sakop sa BAC. Ilang tan-awon ang dukomento kon haum ba ang Aikalami Foods nga mosulod og dinagko nga kontrata sa kagamhanan. 

Ang dukomento ra ba nga nakuha nako gikan sa Securities and Exchange Commission (SEC) mora’g nagduda ko nga dili makasulod ang Aikalami Foods sa ingon niini kadako nga kontrata kay gamay ra ang iyang “paid up capital.”

Lain nako nga gikuyawan nga kon ang mga pagkaon nga ihatag ngadto sa lainlaing tunghaan alang sa feeding program, basin og mawari-wari lang ug dili gayud kapahimuslan sa mga bata ang tanan.

Samtang gidayeg nako si higala Raddy Diola, ang action officer sa CCNC sa dalaygon kaayo niya nga proyekto sa kabataan, awhagon nako siya ug ang ubang opisyal sa City Hall nga magmatngon nga dili maduhigan og bati nga dungog kining maong proyekto.