Fight mayor Mike!

Daygon g’yud nako si Mayor Mike Rama sa iyang baruganan nga dili g’yud usa mobayad sa P133 milyones ngadto sa pamilya ni Rev. Fr. Vicente Rallos kabahin sa karsada nga giingong anaa molagbas sa yuta nga iya sa pari.

Ang mga abogado sa dakbayan sa Sugbo moawhag ni Regional Trial Court (RTC) Judge James Stewart Himalaloan nga usbon unta ang iyang hukom nga nagmando sa City Hall pagbayad sa dakong kantidad.

Ang huwes miingon nga angay’ng bayran sa dakbayan ang pamilyang Rallos sa 4,654 ka metro-kwadrado nga yuta nga gigamit nga karsada sa dakbayan diha sa barangay Sambag II.

Ang karsada gitawag kini karon og Aznar Road, apan matud ni Rama nga gamay na lang kaayo nga tipik sa mayong yuta nga nahabilin nga gigamit nga karsada. Ang uban gitukoran na og mga balay.

Nagpabiling hugot ang baruganan ni Rama nga dili gayud pabayran sa dakbayan ang P133 milyones kay basi sa nadiskobrehan nila nga dukomento nga kaniadtong 1940, daan na nga nagkasabot ang banay’ng Rallos nga magtukod g’yud sila og karsada sa ilang yuta.

Napilde ang dakbayan sa kaso kaniadto diha sa RTC hangtod na ngadto sa Supreme Court kay dugay man sila nga nakadiskobre nga aduna diay “convenio” kon kasabutan tali sa banay’ng Rallos kaniadto pa.

Kon basahon nimo ang “convenio” makaingon ka nga nganong bayran pa man tuod ang maong yuta nga nagkasabot na man daan ang banay’ng Rallos nga maghimo g’yud sila og karsada.

Ila pa man gani nga gikasabotan nga ang karsada idonar nila ngadto sa dakbayan sa Sugbo ug kon dili dawaton ang donasyon, pabilin kini nila nga atimanon ug ipagamit kini sa publiko.

Ang gitun-an karon sa mga abogado sa dakbayan mao ang argumento nga ang “newly-found evidence” maoy maisip nga basihanan nga mabuksan pag-usab ang maong kaso.

Basi sa dukomento, ang kabanayang Rallos nakadawat na og P56 milyones gikan sa kagamhanan sa dakbayan sa Sugbo. Nagtubo man gud ang kantidad niini, bisan gamay ra unta kaayo ang yuta, kay dugay man nga gibayran sa dakbayan.

Samtang gihulagway ni Rama nga lig-on ang gihuptan nila nga ebidensya apan wala siya maniguro nga molampos sa pagpanalipod nga dili gayud mabayran ang P133 milyones.

Matud ni city legal consultant Jade Ponce nga awhagon nila sa dakbayan ang Commission on Audit (COA) nga moapil na unta niining maong isyu.

Gusto usab ni Ponce nga kining maong isyu ipadangat didto sa Office of the Government Corporate Counsels (OGCC) nga maoy abogado sa nasud sa paglaum nga makatabang sila pagpanalipod sa katungod sa dakbayan sa Sugbo.

Kon molampos si Rama sa iyang tumong, angay siya nato nga pagakpakan kay dako kaayo nga kantidad ang nalambigit niini. Tiaw mo P133 milyones? Daghan na kaayo nga mga proyekto nga matukod sa maong kantidad.

Fight mayor Rama!

* * *

Sa tigum ni Market Administrator Raquel Arce sa mga tigbaligya og karne diha sa Carbon market kagahapon, gipangutana ni Arce silang tanan kon kinsa kanila ang migamit og depektoso nga timbangan.

Wala g’yuy bisan usa kanila nga miisa sa kamot. Sa ato pa silang tanan pulos g’yud kuno migamit og dili tikasan nga timbangan. Sigurado ko nga daghan sa maong mga tindera ang mga tikasan.

Ang akong higala mitug-an nga daghang kabayo ug kabaw nga gipang-ihaw ug gitumod diha sa Carbon apan wala g’yud ka makabantay nga may karne nga gibutangan og marka nga “kabaw o kabayo.”

Unsaon, ang maong mga karne ipatoo man sa mga tindera nga karne sa baka aron mabaligya nila sa mas mahal nga presyo. Dili man makadaut ang karne sa kabayo o kabaw, apan tikas ni kay mahal man ang presyo sa karne’s baka apan ang imong gibayran ubos ra og kantidad.

Kining maong mga negosyante angay’ng wagtangon ug hagit nato ni Arce nga maninuod siya aron mawagtang ang mga tikasan nga vendors diha sa Carbon market.

Ang maong mga tikasan nga meat dealers maoy makapaislag sa mga pumapalit. Makaingon man gud ang mga pumapalit nga mas maayo pa og adto sila palit sa department stores kay presko pa kanunay ug wala pa’y tikas.