Tukma lang

Mitingkag ang akong dalunggan pagkadungog nga si Assistant Ombudsman Virginia Palanca-Santiago gipasakaan og kaso tungod kay gipasanginlan nga dili makiangayon sa iyang desisyon.

Ang mipasaka og kaso batok ni Madam Santiago mao ang 14 sa 18 ka tawo nga kaniadtong 2005 iyang gipasakaan og kaso kay nagtoo ang Ombudsman nga gipaburot ang kantidad sa gipangpalit nila nga computers diha sa dakbayan sa Lapu-Lapu.

Gihulagway nila si Santiago nga dili makiangayon sa iyang hukom ug miabuso sa iyang gahum kay nangangkon ang mga complainants nga dili mahal ang P49,000 nga computers, apil na ang computer table ug ubang kahimanan, nga gipalit sa Lapu-Lapu City government.

Usa ka opisyal sa Department of Education (DepEd) miingon nga ang gipalit nga computers sa Lapu-Lapu napahimuslan g’yud sa kabataan, ilabi na didto sa isla. Dili usab tinuod nga wala kini makamit kay walay kuryente tungod kay may generator ang tunghaan nga paandaron nila kon mogamit sila sa computer.

Ang laing argumento mao nga kaniadto gani gi-dismiss man kuno ni Santiago ang kaso nga naglambigit og kongresista sa dakbayan sa Sugbo nga mipalit usab og computers, wala pay lamesa, nga ang kantidad P99,999.90.

Nasabtan nako sa reklamo sa maong mga mipasaka og kaso batok sa opisyal sa Ombudsman nga nagduda g’yud sila nga nagkomboya si Santiago ug si businessman Efrain Pelaez.

Si Pelaez gipasanginlan sa mga complainants nga maoy nangusog sa pagreklamo kabahin sa pagpamalit og computers kay pangulo man siya sa “graft-watch” nga gi-accredit sa Ombudsman.

Nahibaw-an nga sa miaging eleksyon niadtong 2010, si Mr. Pelaez apil sa mga kandidato nga milansar pagka mayor sa Lapu-Lapu apan napilde lang ni Mayor Paz Radaza.

Alang kanako, kay gikwestyon na man ang kridibilidad ni Santiago maayo tingali nga mobulontaryo lang siya nga mobiya usa sa katungdanan ug huwaton ang resulta sa imbestigasyon.

Pastilan, hapit na ra ba moretiro ni si Madam Santiago.

Kon dugay nga maresolbar ang iyang kaso nga adto husaya sa Ombudsman- Manila, dili pa siya makakobra sa iyang pension. 

May amigo man gud nga nangutana kanako kabahin niining maong isyu kon maayo ba nga si Santiago mopahuway lang usa mentras may kaso pa siya.

Buyno, bisan wala tingali lagda nga ang usa ka opisyal sa Ombudsman nga pasakaan og kaso kinahanglan nga moboluntaryo pagpahuway sa katungdanan, apan tan-aw nako nindot kini alang kang Santiago kon iyang himoon.

* * *

Angay’ng panaminan sa katawhan ang nahitabo sa kinabuhi ni Whitney Houston, ang sikat nga mag-aawit nga namatay kaniadtong miaging Dominggo.

Drugas maoy hinay-hinay nga mitumbag sa hagdanan sa iyang kabantog. Human siya maminyo kaniadto, miawop ang iyang kasikat kay nagumon siya sa problema sa illegal nga drugas.

Wala na ganahi ang daghang mga concert producers nga mohimo’g konsiyerto alang kaniya nga makakita pa unta siya og daghan nga kita dihang nakahimo si Whitney og dakong sayop.

Tiaw mo nga dunay usa ka konsiyerto nga puno-puno na ang stadium sa mga tawo nga nagpaabot aron maminaw sa iyang pag-awit apan wala siya makatunga tungod sa drugas.

Dako kaayo ang kauwaw nga nasinati sa producer ug nahasol. Kadto maoy nakapawala nay gana sa mga producer nga mohimo og mga konsiyerto ug ubang kalihukan ni Whitney.

Ang iyang awit nga Saving All My Love For You ganahan kaayo ko maminaw. Nakahunahuna ko nga awhagon ang katawhan nga ang kaagi ni Whitney angay’ng panaminan sa katawhan.

Karon kay patay na man si Whitney daghan g’yud sa iyang mga fans ang nagool. Apan sigurado ko nga ang iyang mga awit maoy magsilbi nga handumanan alang kanatong tanan.

Bisan kanamo sa media, daghang mga “maayo’ng laki” sa pagpanuwat apan nadaut sa drugas. Maayo gani kay ang usa nakabawi pa ug tua na diay sa Mindanao, basin nagtinarong na didto.

Apan duna pay uban nga padayon pa. Bisan mga polis duna sa’y mga adik. Happy Valentines na lang diay kaninyo mga higala!!!