Tul-ira ang hiwi!

Angay’ng paspasan g’yud sa kapolisan ang paglutos sa mga tawo nga naghupot og dili lisensyado nga mga armas, apil na sa mga “peace-keeping volunteers” nga dunay armas nga walay mga lisensya.

Daghang mga nangaigo sa saag nga bala atol sa pagsugat sa pasko ug bag-ong tuig mao nga makaingon kita nga duna g’yuy mga tawo nga natintal g’yud sa pagpabuto sa ilang armas.

Dili usab hinoon kita makaingon nga wala na lang g’yuy mga polis ug ubang mga tinugyanan sa balaod nga wala magpabuto’g armas atol sa pagsugat sa pasko ug bag-ong tuig, apan layo na kini kaayo nga posibilidad.

Ang mga polis, gawas lang niadtong abusado ug mga hambugero, napul-an na pagpabuto sa ilang armas diha sa mga firing range. Apan kining mga tawo nga naghupot og dili lisensyado nga armas, tagsa ra makapabuto.

Kon toohan nato ang pangangkon sa mga opisyal sa kapolisan nga wala nila tugoti ang ilang mga peace-keeping volunteers nga maghupot og dili lisensyado nga armas, usa kini sa rason nga dili sila makapabuto diha sa firing range.

Duna ko’y mga kaila nga mga civilian nga hilig kaayo nga magpabitay-bitay og posas diha sa ilang hawak ug magpabagal sa ilang armas, apan wala diay lisensya. Kining mga tawhana dili imposible nga maoy magpabuto sa ilang mga pusil.

Dalaygon ang ilang gihimo nga mibulontaryo pagtabang sa kapolisan apan ang paghupot nila og armas nga walay lisensya dili usab maayo. Sa ako na nga gibalik-balik nga gusto gani mo nga maghupot og armas, palisensyahi na.

Law-ay g’yud kaayo tan-awon nga moapil kamo sa pagpanakop sa mga badlongon sa katilingban unya labaw pa diay kamo nga dakponon.

* * *

Hangtod karon nagpabiling “buta ug bungol” si SPEED Chief Noel Artes sa akong gireklamo nga tindahan nga anaa g’yud sa aseras diha sa eskena Sikatuna ug Bonifacio.

Gawas sa maong tindahan, duna pay kabahin sa unahan og gamay nga gisementohan og daw fish pond. Ambot unsa kaha’y tinuoray’ng rason ni Artes nga nagpadikidiki man sa paghimo’g aksyon.

 May gikaestorya ko nga iyang mga sakop kaniadtong Sabado. Dili kuno sila makahimo’g aksyon gawas kon orderan sila sa ilang hepe. Makapangutana ko nganong wala man sila mandoi sa ilang hepe?

Pastilan, mao ni ang matang sa imong opisyal mayor Mike Rama?

Ayaw ko’g ingna nga moingon na usab si Artes nga maghuwat siya’g order sa mayor. Nahinumdom ko kaniadto may gireklamo ko nga naninda’g buhi nga mga baboy diha sa karsada sa Lakandula ug B. Aranas nga wala gihapon aksyoni ni Artes.

Gipasaligan niya ang mga City Hall reporters nga iya dayon kunong aksyonan apan diha ra diay sa tumoy sa iyang dila. Mas maayo pa si Market Administrator Raquel Arce nga wala mopasalig kay maoy nakapapahawa.

Paita, kon ingon niini ang matang sa mga opisyal sa atong kagamhanan dili matuman ni Mayor Rama ang iyang kawsa nga tul-iron ang hiwi, han-ayon ang gubot, pahumoton ang baho ug daghan pa.

Naa man unta’y sakyanan kini si Artes nga giisyu sa City Hall apan nganong wala man niya panid-i ug unsay sitwasyon sa dapit nga akong gireklamo.

Nalooy kaayo ko niadtong tiguwang babaye nga naglakaw diha sa karsada kay dili na man makaagi sa aseras nga gibutangan og tindahan, direyot mabag-iri sa sakyanan.

Unsa kaha kon kadtong maong tiguwang suod pa nga paryente ni Artes, dili kaha siya sakitan? Gamita ang imong “sentido komon” Mr. Artes.

Nakadawat ko og suwat-hangyo gikan sa nagpaila nga tag-iya sa maong tindahan nga dili lang unta hilabtan ang iyang negosyo. Walay nagpugong sa usa ka tawo sa pag-negosyo apan ayaw isakripisyo ang mga tawo.

Buyno, kay ikaw ra man tingali ang toohan aning Artes, mayor Rama, bahala ka na nga mohatag kaniya’g kamandoan. Kon dili ka moaksyon, makaingon ko nga dili diay tinuod ang imong slogan nga “tul-iron ang hiwi.”

Apan dako kaayo ang akong pagsalig ni Rama nga aksyonan niya kini kay sa dayon nakong pagtapos og suwat niining maong lindog, mitawag nako si Rama ug mipasalig nga aksyonan g’yud dayon niya ang mga reklamo.