Iwit na sab

Ug natinuod ang gikahadlokan sa mga mamumuo sa Sugbo ug Central Visayas:Sama sa naandan, sila na say labing iwit nga makadawat og usbaw sa suholan—kana, kon mauwaw ang mga sakop sa Regional Tripartite Wages and Productivity Board (RTWPB) ug bakwion ang ilang pagsalikway sa umento sa suholan tungod sa way hunong nga pagsaka sa presyo sa lana ug inadlawng mga palaliton.Kon dunay umento, may sukaranan ang kahadlok nga, sama sa naandan, ang RTWPB 7 say labing tihik.

 •Ang National Capital Region ug ubang rehiyon, apil nang atong mga silingang Eastern Visayas ug Western Visayas, nakahatag na og umento sa ilang mga anak sa singot.Dinhi sa ato, kinahanglan pa tingaling mohilak og dugo ang mga mamumuo.

* * *

Ang pagpapating sa RTWPB 7 maoy usa sa labing lig-ong sukaranan sa sibaw nga awhag nga sublion sa Kongreso ang pagtahan sa ilang gahom pagsubli ug pagtakda sa suholan ngadto sa wage boards kansang mga sakop nideklarar sa ilang kaugalingon nga independenteng mga republika nga makapatuyang lang paghimo bisan unsay ilang gusto.

 •Nag-iyahay lang ang mga sakop sa RTWPB 7, labi nang mga representante sa management ug ang ilang kakonsabong mga representante sa Department of Trade and Industry (DTI) ug National Economic Development Authority (Neda), paghimo og ilang kaugalingong mga numero aron pagpalambo sa ilang napili nga kawsa pag-apiki sa mga mamumuo.

* * *

 •Si Trade Secretary Gregory Domingo niangkon na sa dakong layat sa presyo sa nag-unang mga palaliton, gani nangayo na og pasaylo nga wa silay mahimo pagpugong kay kalibotanon ang kasagarang mga hinungdan.Apan nganong si DTI 7 Director Asteria Caberte mangugat man gihapon nga nalansang ang presyo sa mga palaliton sa niaging tulo ka buwan?

 •Ang Bangko Sentral ng Pilipinas (BSP) nideklarar na nga ang ekonomiya takos nga makadawat og hangtod P25 nga usbaw sa inadlawng suholan.Nganong ang lokal nga buhatan sa Neda manghadlok man gihapon nga ang bisan unsang umento sa suholan makadaot sa mga patigayon sa Sugbo ug sa rehiyon?

* * *

 • Si Presidente Noynoy Aquino, nga maoy nagtudlo sa tanang mga sakop sa wage boards, niawhag nilang usbawan ang suholan.Gipasabot niyang mga negosyante nga inay batokan angayng hangpon ang umento kay magkahulogan og mas dakong halin sa ilang mga produkto ug serbisyo.Si Labor Secretary Rosalinda Baldoz, ang pangu sa National Tripartite Wages and Productivity Commission, nihatag nila og ultimatum pagtakda sa usbaw sa suholan sa wa pa ang Mayo 1.

 •Tungatunga na sa Hunyo, apan padayong giisnab sa RTWPB 7 ang awhag nilang Aquino ug Baldoz.Kinsa man diay ang ilang Bosing?Ang mga anak sa singot maoy labing dakong tinubdan sa buhis nga gisuhol nila.Nganong tua man hinuon pusta sa sektor nga mas gikaintapan sa paglikay kay sa pagbayad sa tukmang buhis?

* * *

Email:[email protected]