Diriyot g'yod maligsi

Ang among director sa The Freeman computer services division nga si Eric Presbitero misugilon nako nga diriyot siya madam-agi sa usa sa danghag kaayo nga drayber og habal-habal sa Lahug.

Samtang naglakaw si Eric duol sa eskena Gorordo Avenue ug Sudlon, Lahug mikalit lang pagtadlas sa iyang atubangan ang motor nga gigamit isip habal-habal.

Suwerte lang kadtong drayber kay buotan man kaayo si Eric, kon lain pa ang natumngan, tingali bastarda na ang maong drayber sa karsada.

Tan-aw nako, ang sad-an niini mao na usab si Arnel Tancinco, ang executive director sa City Traffic Operations Management (Citom).

Duna siya’y gidestino nga usa ka traffic enforcer diha sa maong dapit apan mora lang og kandela nga giugbok, wala makabadlong sa mga drayber og motor nga habal-habal nga matadlas-tadlas sa karsada.

Wala gani kini makabadlong sa mga drayber og motorsiklo nga habal-habal nga anha g’yod magparada sa eskena.

Tingali wala makakita ang traffic enforcer nga kuyaw kaayo ug mabag-iran sa mga sakyanan ang maong mga motor.

Ikaduha, makamugna kini og traffic congestion kay ang mga sakyanan nga gikan sa Gorordo Avenue nga mosulod sa Sudlon Road, mopahinay man g’yod kay naa may daghang motor nga nagparking.

Unya, gipasagdan lang usab sa traffic enforcer ang mga sakyanan nga mag-iyahay lang paglusot sa eskena, kadtong gikan sa Sudlon nga moliko paingon sa Salinas Drive.

Unsa ka man Arnel, wala ka magsuperbisar sa imong mga sakop?

Wala ka g’yod makabadlong sa imong sakop nga anaa ra magbarog sa layo, gitan-aw ra ang mga sakyanan nga nag-iyahay lang paglusot? Unsa may iyang gibantayan?

Una, wala niya pangbadlonga kanang mga drayber og motor nga magsaoy-saoy pagpadagan, ug ikaduha gitan-aw lang niya ang nagkalandrakas nga mga sakyanan nga mag-iyahay og lusot.

Kon usa pa ako ka traffic enforcer nga nadestino sa maong dapit, barugan nako ang eskena aron mapahapsay ang dagan sa mga sakyanan kay walay traffic light ang maong dapit.

Wala ka ba makakita niining maong talan-awon Arnel? Maayo unta og pinaagi niini, makat-on ka na og unsay angay nimong himoon.

Duna man go’y mga panahon nga ang pipila ka traffic enforcers magtinapolan sa ilang trabaho, ilabi na kadtong dili g’yod “dedicated” sa serbisyo.

Mao na’y kuwang sa atong mga enforcers nga unta ang anaa sa ilang huna-huna mao ang pagpahapsay sa trapiko. Unsaon, dunay uban nga igo lang magbarug-barog, sige og patisoy. Usahay makahandom ko dihang aktibo pa ang LTO Task Force Alpha.

Daghan na kaayo karon ang mga drayber nga dakponon, apan dili sila mahadlok sa mga Citom enforcers kay unsaon, dili man usab manakop.

* * *

Nahibulong kaayo ko dihang dunay nanawag kanako og nagpahibalo nga may “reward” ko nga scholarship ug free insurance coverage gikan sa Cocoplans.

Nganong naka-reward man ko sa Cocoplans? Mao g’yod ni ang pangutana nga miabot sa akong hunahuna. Nakaingon g’yod ko nga giilad lang tingali ko.

Mga duha ka buwan na ang milabay, nailad man god ko sa mga babaye nga kawani og insurance company nga anaa diha sa SM City. Ang ilang pagdani kanako gipaagi sa pagpatoo nga makadaug kuno ko’g awto pinaagi sa pagduwa og bingo. Daug ba nga naglanganlangan ra man sila nako.

Mao nga dihang ang tawo nga nagpaila nga taga Cocoplans mitawag, wala kaayo ko ganahi nga makig-estorya. Apan kay miawhag man g’yod siya nga ipakuha ang “reward certificate” sa ilang opisina, giadto nako kagahapon.

Tuod man, nakuha g’yod nako ang scholarship certificate ug ang libre nga insurance coverage gikan sa Cocoplans, kang kansang opisina anaa sa J. Llorente ug Don. Gil Garcia Streets, Capitol Site.

Ang two-year scholarship hinoon alang ra sa mga computer-related courses. Gitawag nako ang Datamex Institute of Computer Technology ug ang nahibaw-an nga bali’g P40,000 ang free scholarship grant sa Cocoplans.

Buyno, salamat kaayo sa Cocoplans paghatag nako niining maong scholarship. Ambot kinsa kaha’y akong paeskwelahon ani, dili man mahimo nga ako. Nakasabot hinoon ko nga gusto ang mga opisyal sa Cocoplans nga mokuha ko kanila og plan.