Monghe sa Sibonga

Sa una ug bugtong higayon nga nakaduaw ko sa bukirang barangay sa Lindogon, Sibonga, sa habagatang Sugbo, labihang bagaa sa mga tawo nga wa kong kasud sa dakong simbahan sa Marian Monks of the Eucharistic Adoration (MMEA). Didto ra mi kutob sa prayer room diin ilang gipahubo ang among sapatos ug gikupoan ang hubo nga abaga sa akong asawa.

Maong labihan nakong kuganga dihang gipahibawo ni Marlon Bellita, ang tagduma sa nabantog nga tulomanong "Rated R" sa DYAB Abante Bisaya nga moduaw sa akong tulomanong "Arangkada" ang doktor sa mga monghe ug duha ka monghe nga nanggawas na sa pundok tungod sa giingong kahiwian sa MMEA nga ilang nasaksihan.

* * *

Si Dr. Edwin Fonghe maoy nag-atiman sa panglawas sa mga monghe nga gipangulohan ni Brother Martin sukad niadtong 2000. Nigawas siya sa niaging tuig dihang iyang gitumbok nga nasuko ang mga monghe sa iyang pagbadlong sa ilang karatula nga niawhag sa mga deboto nga nangreklamo sa kakuwang sa pansayan ug mga lingkoranan sa di na pagbalik.

Si Fonghe nikuwestiyon sab sa mga pangangkon sa milagro nilang Brother Martin ug kaubanan. Matod niya kanunay’ng gipahiran og lana ang dagway sa Mahal nga Birhen aron nga di dayon mauga ang singot nga namugna sa kainit ug humidity sa prosesyon. Nipasangil sab si Fonghe nga gigamit sa mga monghe ang nagkalainlaing rebulto sa Birhen nga nagpahiyom ug nagsubo.

* * *

Si Brother Dodong (di niya tinuod nga ngan) 25 anyos pa dihang nagtuon pagka monghe sa Lindogon. Gibatbat niyang mga hinungdan sa iyang paggawas:

• Wa siya tuguting makabasa sa bisan unsang libro sa library nga makapalawom sa iyang kinaadman sa pilosopiya ug relihiyon;

• Labing dakong bahin sa ilang panahon gigahin sa pag-ihap sa mga sensiyo nga amot ug pagsunog sa mga petisyon sa mga deboto sa way pagpangaliya alang nila;

• Pahubuon gyod sila sa tanan kun mangaligo; ug

• Kanunay’ng gigakus-gakos, gisabak-sabak, gihikap ang pribadong mga bahin sa iyang lawas ug gihagad siyang makighilawas sa mga monghe.

* * *

Si Brother Paul Cabillon maoy labing kontrobersiyal. Siya’y usa sa nagsugod pagpalambo sa ilang pundok sa Lindogon pinaagi sa pagpakilimos, hangtod nga nakatukod sila’g payag, ug dayon simbahan. Nibiya siya sa MMEA niadtong Enero karong tuiga tungod sa giingong pagpanghasi ni Brother Martin ug kanunay’ng pagpanghagad og pakighilawas sa laking mga monghe nga nagpahimus sa iyang kabayot.

Nagpakahilom si Brother Paul. Hangtod nga nigawas ang iyang hulagway sa "Bag-ong Lungsoranon," pamantalaan sa Artsidyosesis sa Sugbo, uban ang pasangil nga nakalapas siya sa mga lagda sa MMEA. Nagtagutago siya ug diriyot mabuang kay ang notisya gipirmahan di lang ni Brother Martin kun dili apil nang Arsobispo Ricardo Kardinal Vidal. Gitabangan siya ni Dr. Fonghe. Karon determinado silang maningil og kaangayan.

* * *

Email:[email protected]