Operation Kilum-kilom!

Nag-anam na g'yod kadaghan ang mga sakyanan nga magdagan sa karsada panahon sa gabii nga ang mga drayber motuyo nga dili mopasiga sa suga, samtang ang ubang sakyanan depektoso ang suga.

Kagabii lang, paingon ko sa barangay Busay gikan sa downtown area dul-an sa 20 ka sakyanan - mga passenger jeepney, taxi ug motorsiklo - nga nasugatan nako nga nagdagan sa karsada nga walay suga.

Pipila sa maong mga sakyanan bulhog kay usa ra ka suga ang nagsiga. May uban usab nga sakyanan nga akong nasundan nga walay suga sa luyong bahin nga kuyaw kaayo madumbolan.

Dihang bata pa ako kaniadto, pirmi ko nga makadungog nga ang kapolisan, ilabi na ang Highway Patrol Group kanunay'ng mohimo og Operation Kilum-kilom.

Karon, unsa na may gihimo sa mga sakop sa City Traffic Operations Management (CITOM), PNP Cebu City Traffic Group ug Highway Patrol Group? Nganong wala man ninyo pangdakpa kining maong mga drayber?

Tabla ra nga walay mga utok kining maong mga drayber nga motuyo g'yod nga dili mopasiga sa ilang suga samtang magdagan sa karsada panahon sa gabii. Wala sila makahuna-huna nga makahatag sila'g peligro sa ubang motorista.

Dili angay'ng pasayloon kining maong mga "reckless" nga drayber. Awhagon nako si Cebu City police director Patrocinio Comendador, PNP Traffic Group chief Andres Bayarcal ug ang hepe sa Highway Patrol Group nga banhawon unta nila ang Operation Kilum-kilom.

Magkagot ang akong ngipon nga makakita og mga sakyanan nga magdagan panahon sa gabii nga walay suga kay makahatag kini og peligro sa ubang mga motorista ug sa mga tawo nga maglakaw.

Suwerte lang g'yod kining maong mga drayber nga natudlo si Arturo Lomibao nga hepe sa Land Transportation Office kay nasuspenso ang operation sa Task Force Alpha.

Unsaon, hangtod karon wala pa g'yod maisyu ang bag-ong deputization sa mga LTO agents nga kusog unta kaayong manakop sa mga badlongong drayber kay kuno dunay mangayo'g bayad aron maisyu ang ID.

Sagdi na lang, dili man usab magdugay sa puwesto kini's Lomibao pagka hepe sa LTO.

Ang wala g'yod nako magustohi mao nga wala mangusog ang kadagkoan sa LTO dinhi sa Central Visayas pagtabang sa mga deputized agents.

Daku man unta kaayo og natabang ang mga deputized agents aron makaangkon og maayong accomplishments ang LTO dinhi sa rehiyon.

Dili ba kini tinuod regional director Raul Aguilos?

* * *

Sugod kagahapon, si Vice Mayor Michael Rama maoy acting mayor sa dakbayan sa Sugbo kay tua sa Houston, Texas si Mayor Tomas Osmeña.

Daghang hagit ang nagpaabot aron pamatud-an ni Rama kon duna ba g'yod siya'y political will sama ni Bayani Fernando.

Kinahanglan nga ipakita niya ang walay kukahadlok ug walay kukaikog nga mga desisyon aron dili siya matan-aw nga dili haum nga sangonan isip mayor.

Una niyang aksyonan mao ang mga tawo nga nagtukod og mga baligyaanan diha sa aseras sa Osmeña Boulevard atubangan sa Abellana National School.

Unya, mas labing maayo unta kon mapahapsay niya ang atong mga aseras. Wala ko magpasabot nga did-an na ang pagpamaligya, apan hapsayon lang.

Kining mga tawo nga ilang gisaligan aron makontrolar ang mga vendors ug mapahapsay ang atong mga aseras, maayong pangilisan sa puwesto kay nagduda na ko sa lihok aning mga tawhana. Maayo lang sa sulti.

Wala pa ko malimot sa sulti kaniadto ni Gerry Marquez, ang consultant sa Division for the Welfare of Urban Poor (DWUP) nga "one-side vending" ra ang ilang itugot sa dalan Colon.

Unsa na man Mr. Marquez? Natuman ba nimo ang imong pasalig? Basin og ipahid na usab nimo sa Squatters Prevention Encroachment Elimination Division ang palpak?

Unsa man diay trabaho aning pito ka tawo nga kawani sa City Hall nga anaa madestino kanimo nga anha mag-standby sa Plaza Sugbo kon dili ka pa moabot sa City Hall?

Kining mga tawhana makamao kini motrabaho, apan basin og ang problema wala sila hatagi og trabahoon. Husto tingali ang awhag sa pipila ka sakop sa SPEED nga pangutan-on ka unsay inyong accomplishment.

Maayo tingali nga apilon pagtan-aw ni Rama kining mga kawani sa City Hall nga pirmi nakong makit-an nga anha mag-standby sa lobby sa legislative building, manigarilyo ug magsultihanay lang.