Kumo ni Pacman

Sa kapaspas sa kumo ni Manny Pacquiao, o tungod ba sa kaluya na sa akong mata, sa slow motion na nako naklaro giunsa niya pagpatumba si Ricky Hatton kaduha sa unang hugna ug sa kataposang higayon sa ikaduhang hugna. Wa ko mag-inusara. Si Hatton wa sab kahibawo diin gikan ang kumo nga nakaigo niya. Wa hinuon siya motino hain sa mosunod:

• Ang right hook nga nakasunggo sa iyang ilong ug nakapalamba niya sa unang higayon sa unang hugna;

• Ang left hook nga nakaigo niya samtang naapiki sa pisi ug nakapatumba niya sa ikaduhang higayon;

• Ang hana nga tuo nga pasiuna lang diay sa makalilisang nga left hook nga nakawingig sa iyang apapangig ug nakapatug niya.

* * *

Mahimong ang gipasabot ni Hatton mao ang dul-an sa duha ka gatos ka mga kumo nga gipabaha ni Pacquiao sa mubo kaayo nilang sangka. Sud lang sa kapin sa lima ka gutlo, nakabuhi si Pacquiao og 127 ka kumo, nga 73 ang nakaigo (57%). Si Hatton nakahimog 78 ka kumo, nga 18 ray nakaigo (23%). Si Pacquiao nakahimo sa bog 65 ka power punches itandi sa kang Hatton nga 16.

Si Freddie Roach maoy nipasabot sa ubang mga nahitabo sa sangka nga mahimong wa dayon nato makita: Bistado na nilang baraha ni Hatton—mohana siya sa di pa mosukmag ug ganahan kaayong molabay og right hook, ug mao ra gyod ni iyang paagi sukad pa niadto—maong wa maglisod paglikay, pagsagang ug pag-atake niya si Pacquiao.

* * *

Si Floyd Mayweather Sr., ang trainer ni Hatton nga nakapasuko pag-ayo sa fans ni Pacquiao tungod sa lahap niyang mga panganti, sobra pa sa nibakwi sa iyang mga pagdayeg ni Hatton pinaagi sa pagmakmak sa iyang kaugalingong boksidor: Si Hatton way depensa, di kamaong mosibog human manukmag, nibalik siya sa karaan niyang taktika, mirisi niya.

Nagkauyon silang Roach ug Mayweather Sr. nga angay nang moretiro si Hatton. Matud ni Mayweather Sr. di nang kabawi si Hatton human napakatug ni Pacquiao.

* * *

Nakakita sa hingpit nga pagkausab ni Pacquiao ngadto sa pagka labing takos nga boksidor sa planeta ang naglungutlungot nga sunod nga makigsangka niya—si Floyd Mayweather Jr., nga mobalik pagkatkat sa ring batok ni Juan Manuel Marquez karong Hulyo.

Apan gibutyag ni Roach ang babag sa panag-abot sa duha: Timbang. Niinsistir si Mayweather Jr. nga magsangka sila sa 147 pounds. Samtang si Pacquiao mas ganahang magpabilin sa 140 pounds. Matud ni Roach mas dako ang kahigayonan nga sunod nga ikasangka ni Pacquiao si Shane Mosley sa Estados Unidos o si Miguel Cotto sa Puerto Rico. Masaligon si Roach nga si Pacquiao makapilde ni bisan kinsa—ning higayona sa iyang pamoksing—uban sa lisod iphon ug sagngon niyang mga kumo.

* * *

Email:[email protected]