Angay pa gani nga daygon

Dili tingali maayo nga sa tanang higayon ipatigbabaw ni Mayor Tomas Osmeña ang iyang garbo.

Gihulagway na usab niya nga wala kuno kinahanglana sa Sinulog Foundation Inc. ang gihatag nga P2 milyones sa probinsya sa Sugbo.

Ang iyang rason mao nga ang City Hall kuno dunay kapin sa P250 milyones nga surplus sa iyang budget kaniadtong miaging tuig.

Sigurado ko nga ang pagpahatag ni Gobernador Gwen Garcia sa maong hinabang alang sa Sinulog Foundation Inc. walay sagol pamolitika.

Ang tumong ni Gobernador Garcia mao nga matabangan ang Sinulog Foundation alang sa mas malampusong kalihukan sa Sinulog mardigras.

* * *

Kabahin sa isyu nga si Jonah John Rodriguez gipagawas gikan sa VIP section sa grandstand atul sa Sinulog grand mardigras, makaingon ko nga "may rason ug way rason" ang City Hall.

Kon moingon ang mga opisyal sa City Hall nga wala malista si Jonah John sa mga gihatagan og VIP pass, ang uban usab tingali wala man malista.

Sama pananglit sa mga media outlets nga gipanghatagan og tag duha ka VIP pass nga wala butangi daan og ngalan.

Ang kadagkoan sa mga media outlets maoy nagbuot kon kinsa ang ilang hatagan. Mao tingali kadto kang Rodriguez.

Ang maayo ni Rodriguez nga kon sa tan-aw niya nauwawan siya sa gihimo sa mga opisyal Sinulog Foundation, hala ikiha sila sa korte.

Ang baruganan ni Mayor Osmeña nga unsaon pagka VIP ni Rodriguez nga usa man kini ka "convict" sa kaso nga libel nga gipasaka ni ginang Margot Osmeña didto sa hukmanan.

* * *

Daghan ang miuyon sa akong argumento nga si Konsehal Junard "Ahong" Chan sa dakbayan sa Lapu-Lapu dili maayong mogamit sa isyu sa pagkasirado sa Rural Bank of Subangdaku aron makatira siya sa iyang mga kontra sa politika. Maklaro man god kaayo ang iyang tumong nga kunohay mihimo siya'g demanda aron pagpalutaw sa ugat sa maong problema, apan ang tumong mao nga makabirada siya sa sawa sa politiko nga nahimo na niyang kontra sa politika.

Gituyo nako nga dili na lang mohingan sa mga hingtungdan kay sa giingon na nako, basin og makahaling pa kita og dugang kaguliyang og makaapekto pa kini sa laing mga rural banks.

Nasayod ko nga utokan kini si Konsehal Junard ug maminaw siya sa sentimento sa katawhan nga kon padayonon niya ang iyang pagsalmot sa isyu, posibleng makamugna kini og dugang kadaut sa banking industry.

* * *

Maayo unta og manakod sa ubang dagkong politiko ang gihimo ni senador Bong Revilla Jr. nga mihatag og hinabang alang sa Vicente Sotto Memorial Medical Center.

Pinaagi sa usa ka milyon ka pesos nga tabang nga gihatag niya ni gobernador Gwen, daghan nang mga kabus nga pasyente gikan sa probinsya ang matabangan.

   Unya, duna pay laing P10 milyones nga gisaad si Bong alang sa mga proyekto nga ang Kapitolyo maoy magbuot kon unsa kini nga makahatag og binipisyo sa katawhan.

* * *

Sa Sinulog mardi gras, kadaghanan sa mga crowd control personnel maayo lang sa buntag pa. Inigkahapon, wala nay pwersa. Ang uban mamiya sa ilang pwesto.

Resulta, hapit dili na maagian sa mga dancers ang usa ka lugar. Dili ba maayo nga ang parade route butangan og dapit nga pareho sa City Sports Center adto usab ang mga dancers mohimo og huygo g'yod nga sayaw?

Ang dapit nga mahimoan niini mao ang General Maxilom avenue nga mag-atubang sa karaang Sacred Heart ug ang stage magtalikod sa menteryo sa kareta.

Lapad man kaayo ang karsada sa maong dapit ug mahimong kabutangan og stage. Dayon may kaagian pa g'yod sa mga floats nga dili na kinahanglang moagi sa stage.

Ang maong dapit butangan og daghang mga kalingkoran. Apan tan-aw nako dili ni paboran sa uban kay gihimo man nila ni nga negosyo god adtong mosulod sa Sports Center.

Apan kon himoon nila ni, unya pabayran lang ang tiket sa motan-aw sa maong dapit, magsilbi kini nga dugang income kay di man gyod masulod ang tanan sa sports center.

* * *

E-mail: [email protected]