Alang ni higalang Arnel

Nganong wala man ipamaligya kining daghang sakyanan nga gitipigan sa kapolisan nga anaa sulod sa ilang mga kampo, ilabi na diha sa Camp Sotero Cabahug?

Nakasabot ko nga ang uban sa maong mga sakyanan dili pa mahimong ibaligya kay ebidensya man kini sa mga kaso nga ilang gipasaka batok sa ilang mga dinakpan.

Apan daghan diha sa mga sakyanan nga ebidensya sa mga kaso nga dugay ra kaayo nga naresolbar sa korte. Usa niini mao ang L-300 van nga gigamit kaniadto pagdagit sa magsoong Chiong.

Nahinumdom ko nga ang Commission on Audit miingon nga kining maong mga sakyanan, ilabi na kun nadeklarar na nga “confiscated in favor of the government” maayo nga ibaligya aron makwartahan.

Karon god, pwerteng huota na sa kampo uy. Daghan kaayong mga sakyanan nga gitanggong diha nga mga dinakpan sa Highway Patrol Group-7 nga nakapadugang sa kapahuot sa kampo.

* * *

Akong awhagon ang kadagkoan sa Highway Patrol Group-7 nga balikon nila ang kampanya nila kaniadto nga gitawag og “Operation Kilum-kilum.”

Ambot nahinumdom ba kaha ang mga sakop sa Highway Patrol Group niini. Mga bag-o na man ni sila. Ang pagpahigayon sa Operation Kilum-kilom gitumong aron dakpon kadtong mga sakyanan nga magdagan panahon sa gabii nga dili magsuga.

Nakahinumdom ko niini kay kaniadtong Biyernes sa gabii, daghan ko og nakit-an nga mga sakyanan nga wala magsuga samtang nagdagan sa Gorordo Avenue. Pipila niini mga passenger jeepney.

Dunay lagda nga gilatid diha sa Republic Act 4136, ang Transportation and Traffic Code nga kinahanglan na g’yod nga magsuga ang mga sakyanan lapas sa alas sayes sa gabii.

Ambot, sa City Traffic Operations Management, ang mga traffic enforcers wala usab tingali hatagi’g kamandoan niining Arnel Tancinco nga kunohay maoy nagdumala sa Citom.

* * *

Tulo na ka buwan nga kini si Arnel Tancinco nanghambog nga ipatuman niya ang lagda, apan wala g’yod makahimo.

Tan-awa ra god kanang building diha sa duol sa sapa sa Echavez Arnel – kanang Casa Amigo – pangutan-on ko ikaw kun mituman ba kana sa parking requirements.

Pag-agi nako diha niadtong Biyernes sa gabii, nahasul g’yod ang nangagi kay miatras man kadtong nag-parking. Natukod ang maong building lapas na 1995 ug wala kana’y rason nga mangatarungan pa.

Unya, daghan pa kaayong mga PUJ sa Mandaue (21-B ug 22-B) nga padayong namasahero subay sa Osmeña Boulevard nga wala ninyo dakpa sa Citom.

 Mangutana ko, unsa nakadawat mo’g padangog gikan sa mga operators niining maong mga PUJ aron dili sila dakpon?

Wala manglimbawot ang imong balhibo nga naghuna-huna nga gikulban ninyo’s kaldero ang ubang operators kay gitanggong ang ilang PUJ kay mibiyahe diha unya ang uban gitugotan pagpamasahero?

Akong tambag sa mga operators sa Mandaue kang kansang mga PUJ gitanggong pa karon sa Citom nga pasakaan ninyo’g kaso sa Ombudsman kini si Arnel Tancinco tungod sa iyang “unfair enforcement.”

Ang ordinansa sa dakbayan wala maglatid nga pilion ra ang dakpon. Apan kini si Arnel Tancinco, pili-pili ang paagi sa pagpatuman. Nanghambog nga kun makadawat siya og inpormasyon batok sa mga wala motuman sa balaud, iya dayong aksyonan, pero kutob ra’s dila.

* * *

E-mail: [email protected]